RAM LEH HNAM HMASAWNNA ATANA

AUTONOMOUS DISTRICT COUNCIL

AIA PANCHAYATI RAJ THAT ZAWHNATE

 

Mizote hian kan tih ve theiha kan ngaih chinah leh kan tih ve peih chin zelah chuan kan aia hnam upa tawh zawk leh hma pawh lo sawn thui tawh zawk, heng Assamese, Bengali, Gurkhali leh vai hnam dangte pawh kan umphak vein kan pawl ve phak mal zei chu niin a lang a. Amalserawhchu, kawng hrang hrangah hian kan naupanna a lo lang leh deuh thin a, fuih leh fak leh kaihhruai deuh reng kan la ngai niin a lang. Naupang rapchung tawng thei tirin an inlengte zawng zawng nenah a rapchung tawng theih tawh thu lo hrilh zel a chak anna riau pawh kan neiin kan lawmnate a la holam hle chang leh kan vuivainate pawh a nep viau chang a la awm fo thin.

 

Mahni pianpui tawng hmanga lehkha ziak chhiar thiam leh ziak chhawng ve leh thiam chang chang chin chhiara Mizorama mihring za zela sawmriat pariat (88.49%) chuan lehkha ziak leh chhiar kan thiam thu, kan ram zim leh mihring tlemzia ngaihtuah thleng hauh lova India rama lehkha chhiar leh ziak thiam tamna ber dawttu State ni tak tak mai awm taka insawi kan hreh lo chauh ni lovin, hnam dang kan rama lo zinte hnena thu kan sawi nikhua leh kan ram chanchin kan ziakna tinrengah kan ziak tel thlazen mai zawng a ni a. Sap tawnga thupui vai thei chin emaw, titina atana hmang ngam chin emaw, an ziah sual hmuh nghal mai tur awm lova article puitling chin deuh, thu mal sang hnih hmanna tur khawpa sei sap tawng hlirhlang hmanga ziak ngam chin chauh emaw te hi lehkha ziak leh chhiar thiama ngaih tur ni ta mai sela chuan, za zela sawmthum (30%) bak kan pel thui vak lo mai awm mang e ti a suangtuah a awlin vai tawng (Hindi) dak tha pangngai deuhva thu sawi a, Devnagiri hawrawp ngat hmanga article ziak thiam phei chu kan vang lehzualin za zela pakhat pawh kan inhmu zo ngut lo mai ang tih hlauhthawn awm tak a ni.

 

Chuvang chuan kan khaw hawi a tawiin kan boruak chhaih pawh a hniam tlang a, kan thil hriat a tlemin a chiang thin lo va. Hre tam deuh tura lehkhabu tha chhiar peih kan ngah lova; chik taka thil chhutte pawh kan peih hlawm lovin kan zawh bel tawhsa bak kawng thar zawn belh pawh kan peih hlawm lo a ang thei thin hle. Kan ram leh hnam hian hma sawn ve ila kan ti a nih chuan, kan kawng zawh belsa chauh zawh reng ringawt lova kawng thar kan zawn belh a pawimawh a. Keimahniin kawng thar chu kan zawng peih ngang lo a nih pawhin mi kawng zawh hnumsa zawh ve mai tur a thlur sung a, chung chu zawh ve a, hmasawn tura kan pen chhuah ve a pawimawh hle a ni.

 

Kan zinga mi tam tak hian chuan Constitution a Seventh Schedule-in thuneihna min pek hmang thei tura State-ah kan chuankai tawh hnu thleng hian Sixth Schedule hnuaia Autonomous District Council hi kumkhuaa kan chanvo ni reng tur emaw an la ti niin a lang a. Mi thenkhat dang leh chuan Autonomous District Council tih tawngkamah hian sap tawng thu mal pakhat "Autonomous" tih a tel vang hi nge ni, a tlukpui dinhmun tha dang pawh awm thei mang lo hial, Independence tluk deuhthaw a thaah an ngai a ang thin hle. Dik tak chuan, Sixth Schedule hnuaia Autonomous District Council-in mahni tawka thuneihna (autonomy) a hman theihna chin chu paragraph 3-na hnuaia dan siam theihna point sawm a neih te, paragraph 6-na hnuaia Primary School din theihna a neih te, paragraph 8-na hmanga Sawrkar hnathawk emaw, sumdawng emaw te hnena chhiah khawn theihna tur leh ran chhiah, motor chhiah, lawngleng chhiah, luia lawngleng emaw, maupum ilo emaw te a inthiarkaina leh sikul, damdawiin leh kalkawnga kal chhiahte an khawn theihna tura dan chi khat (regulation) an siam theihna te, paragraph 10-na hmanga Scheduled Tribe ni lo an rama cheng vete sumdawn leh tangka inpuktir khuahkhirhna dan (regulation) an siam theihna leh paragraph 12-na hmanga Parliament leh State Legislative Assembly dan siam thenkhatte hman loh theihna leh anmahni thuneihna pawna zu khapna dante hmang ve lo tura thuneihna an neihte hi ni berin a lang.

 

Paragraph 3-na hmanga dan (Act) an siam theih te hi chik zawk deuh hlekin lo thlir leh ila. Heng a hnuaia mite hi Autonomous District Council-in an ram hmasawnna atana dan an siam theihna chinte chu an ni :-

 

(a)    Reserved Forest-in a huam phak bak ram khawpui leh thingtlanga chengte hnena thlai chinna atan emaw, ran tlatna atan emaw, chena in sakna atan emaw, thlai chinna lam hawi lo thil dang tihna atan emaw a hman tura pek theihna leh luahtir theihna te, then hran theihna tur tea hman tur dan chi hrang hrang te; (allotment, occupation or use, setting apart of land other than any land which is a reserved forest for the purpose of agriculture or grazing or for residential or other non-agricultural purposes or for any other purpose likely to promote the interests of the inhabitants of any village or town).

 

(b)    Reserved forest tur ni lo ram ngaw dang siam belh leh humhalh theihna tur dan te; (the management of any forest not being a reserved forest).

 

(c)     Thlai chawmna atana hman tur tui lak leh tui kawng awmsate hman tangkai theih dan tur ruahmanna dan te; (the use of any canal or water course for the purpose of agriculture)

 

(d)   Lo atana ram hrang hrang kum tina theh sawn chite theh theihna tura hman tur dan te; (the regulation of the practice of jhum or other forms of shifting cultivation).

 

(e)    Khawtlanga roreltu pawl din theihna leh an thuneihna tur chin ruahman lawkna tur dan te; (the establishment of village or town committees or councils and their powers).

 

(f)      Khawpui leh thingtlanga chengte rorel sak dan tur leh khawpui police tur emaw, thingtlang khaw police tur emaw te din theihna leh vantlang hriselna lam gaihtuah theihna tur dan te (any other matter relating to village of town police and public health and sanitation).

 

(g)    Lal (Chief or headman) tur ruat dan tur leh an roluahtu tur rel fel theihna tur dan te; (the appointment or succession of a chief or headman).

 

(h)   Mipui mimir zinga ro inluahchhawn dan tur te; (the inheritance of property).

 

(i)      Nupui pasala inneih leh inthen leh duh huna hman tur dan te; (marriage and divorce).

 

(j)      Pipu chena dan atana kan lo neih tawh thin te hman zui zel tur chin leh hman tawh loh tur chin thliar felna tur dan te (Social customs).

 

Heng ho zingah hian, mizoram hmun tam zawk hi tlang pang hmun awih, lei thawl bawk si an nih hlawm avangin clause (c) hian awmzia a nei thui thei lo hle a. Kum tina ram theh sawn duat duat reng mai hi a that loh em avang hian tunah la titawp thei chiah rih lo mah ila, tihtawp thuai atan a tha hle a. Chuvang chuan clause (d) a thuneihna awm mek hi sut vat atan a tha hle a ni. Mizoramah hian Lal (Chief) kan neih tawh loh avangin clause (g) hian awmzia a nei tawh lo va. Clauses (i) leh (j) a thuneihnate hi State Sawrkar pawhin awmze neia a la kalpui tak tak hleih theih loh an la nih avangin Autonomous District Council tan phei chuan hman ngaihna awm mang hlek lo thuneihna, an rula raw neih ve mai mai a ni ber a. Chuvang chuan awmze nei deuh hleka thuneihna an hman theihna chinte chu clauses (a), (b), (e), (f) leh (h) te hi an ni lekfang nghe nghe a ni.

 

Source:

DAN LEH HRAI (Legal Awareness Magazine), Vol. VII, Issue 10, March-April 2007, A legal Services Authority Publication, Aizawl

 

---------------