TUA DISTRICT COUNCIL THUNEIHN A IN BANG TAN HAMPHATNA HON TUN DING SA A HICHI TUK A KITHALAWP I HI UA?

 

T.K. Zadou

Zogam Thinker

 

Manipur Hill Area Autonomous District Council Act, 1971 nuai ah thuneihna mulmal lou tak nei in MDC term 3 tan i na neita ua, lungkim huai i sak louh man un Sixth Schedule tan a dopsang ahih keileh election om nawn dah mai hen chi’n kum 21 sung vingveng i na dek ta uhi. Tu’n, member 18 ompen 24 om ding in leh education lamah Class VIII tan leh medical ah primary health sub-centre tan tawh village administration leh village land (un-surveyed land) te enkol thei ding in Manipur Governor Ordinance, 2008 ah hon behlap sak nimnem uhi. Himahleh, 6th Schedule hi diaklou in, amin maimai a sub-standard administration minpu a hon piak uh ahihman in, tua District Council ah i phat tuam pih luat ding uh omlou ding hi. A ziak bel subject hon piakte uh enkol ding, kem ding, vak ding, khoi ding chih himahleh a kep ding dan, a khoi ding dan (Bye-Law & Regulation) bawl theihna MDC te khut ah piak hilou hi. Manipur Kumpi in Dan a bawlsate dungzui mah a enkol ding ahi uhi. Tuate banah, a etkolna ding sum leh pai leng Manipur kumpi mah in hon sanction tawm zel ding uh leh a daih loute Council in a zon tawm ding uh hi zawmah lai hi.

 

Kei muhna ah hiai anuai a kipiate (point) i mai tuah ding uh leh i hamphatna leh hamsiatnate koi gikzaw hiam chih Mipite’n i bil dawh ding un ka hon taklang hi.

 

1. I HAMPHAT PIH LAWH DIA GINTAKTE:

(a) Mi 26 vel elected member (DC equivalent) leh gazetted officer i hong hi ding ua, certificate tuamtuam a attested bawl thei i tamta ding uh.

 

(b) MDC te’n khalawh bangzah hiam kum 5 sung hon nei ding ua, a kipei thei deuh te’n in-le-lou leh gari hon neihlawh ding ua, a innkuan mite’u leh a deihsakte uh mi bangzah hiam in sepna hon ngah ding uhi.

 

(c) Organisation tuamtuam a chief-guest ding a hong baihlam deuh ta ding.

 

(d) Buaina neu khakha neite a din gensaktu, awlmawhtu a hong tam deuh ta dia, i puak uh a zangkhai tuam mahmah ta ding hi.

 

(e) Council nuai a semtu/kumpi nasem chih piandan band zah hiam a hong pun beh dia, zi-leh-ta vakna ding awlsam deuh a muhna nei hong pun beh ding hi.

 

(f) Gamsung haksatnate kumpi kiang a tun ding makai/elected member i hong tam deuh ta dia, mi narante leh self-style public leader a hong tawm deuh ta ding hi.

(g) Nidang a MLA/MP-te kiang a i va tut uh ngai, Imphal va phak ngai a, tu in bel Lamka khawpi sung tan chauh pha in mimal hamphatna hiam/hamsiatna tampite i gen theita ding uhi.

 

(h) Nidang a salam buk ding tawmchik i neih uh tu in salam buk ding tampi in hong kibehlap ta ding ahihman in, i hamphatna zong hong kibehlap peuhmah ding hi.

 

(i) MDC a omlouh sang in a om in gam leh nam a ding in hamphatna, khantouhna kalbi 2/3 bek i neih lawh himhim ding uhi.

 

2. MDC NEIH IN TUNG GIKNA HON TUN DIA MUAN MAWHNA TE:

(a) Local tax levied ahon bawl ding ua; (i) Hol (meihol) tax, (ii) Buh leh bal tax, (iii) Sing leh gua tax, (iv) Khawpi sung a vanzuak dingte puaklutna (tax), (v) Market tax, (vi) Amusement tax (phone tax), (vii) Gam tax, etc. Mizawngte’n kivakna ding a i neih sunsun apat tax hong kila ding a, pawl tuamtuam a tax i piak tawh, Sukte kumpi te’n sial siah, bawng siah, ak siah, 1/10 siah ana kaih mah uh hong bang dia, mizawngte a din haksatna lianpi hon tun ding hi.

 

(b) District Council nuai a sem te’n kumkhat sung in lawh (pay) khat vei khong a la zou phet ding uhi. Aziakbel Council budget pen avek in State solkal in ana pomsak khol kei ding ua, 50% lel khawng pe le uh a zatna dia a hisap uh buaise gawp ding ahihman in. Council nuai a semte leiba in a pumdim ding uhi.

 

(c) Subject a etkolte uh a sum sanction ki ning chinglou ding ahihman in hoih tak a kep a om theikei dia, adarh gai vek ding hi. Class V tan bawn enkol zoulou in Class VIII a etkol ding uh tuh, education system segai ding chihna ahimai.

 

(d) Lampi, lei, kikawm tuahna lampite banah Dev. works dang teng leng a etkolna ding sum leh pai teng MDCte sakhau a lut ding tawh kidaih mahmah lou ding ahihman in, i gam uh loutul mah hong bang ding hi. Amau leh kihih faifuk nuamsan ding ua, mizawng nek ding tak ngial neilou pi khawlak a vak chiang a sathau kinuh zawl a, mai powder kinuh puang thetthat a, muk lipstick san velvol a kinuh a lampi a paite mah a hong bang ding uhi.

(g) Manipur a District Council mun 6 aom ahihman in, etdan leh kep dan kibang in State Govt. in hon enkol dia, ei a khangtou deuh Lamka lamte leng akhangtou loh Tamenglong lamte dinmun ah i kesuk ding uhi.

 

Huaiziak in, 6th Schedule lou zaw buaihuai maimai chi a Election om nawmlou dia i na nawlhsa uh tu a i kipahpih thak zel uh lamdang kasa hi. Adiktak in, Manipur ah 6th Schedule 2 (nih) chauh a om ding ahi. Naga te a leh Naga loute a, Nagaloute eite pawl pauleham, tatdan, tawndan, minlepuam leh behlephung kibangte bang hang a iki khen mawk thei i hiam? Kuate doha nekha i hia? Kuate Divide & Rule Policy valh kha i hia? Mite’n gam lian leh nam tampite tung a vai ahawm nop lai ua eite’n gam neuchik leh nam tawmchik i deih mawk uh bang chidan a hia? Tuni a nang gilpi vahna ding leh nang thawlna ding na et leh zingchiang in natate agil uh hong kial dia, khutdawh ami simmawh a hong vak ding uh ahi chih i theih ding uh ahi. Tungnung utna tuh niamkiakna ahi a, Nektam utna tuh nektawmna bul ahi, thupil in achi ve. Ken zaw 6th Schedule mah phu tinten leng ka chi lailai.

 

PS. MDC te’n 6th Schedule ahon phu khe na kei ding ua chih ngaihdan nei pawl a om, a phu theimah uh. A phut uleh a kitawp uh a ngai dia, ahih keh tawpsak (dissolved) a hong hi ding ua, Election om nawn lou in angei bok dinmun ah i tusuk ding uh. Huaiziak in, mipite mah in pan i lak ua 6th Schedule i nawh uh a poimawh pen ahi.

 

––––––––––––