CIIMNUAI MAW ZOMI?

- J. Thang Lian Pau | 12/2/2000

 

 

 

Zonet tungtawna i nasep/ kizopnate panin a hoihna leh a hoih lohna mu khawm ka hih  manin hih group thak vai nong phulawh pen dik ka sa a, ken zong ka phulawh sawm mah hi-in, i lungsim a kibang gige hi ci pah ing.

 

Zo minamte sungah kideidanna omin 'I minam' i cih ciangin i kawk leh i pom a tuam ciat ahih manin Zonet-ah Zomi(eimi)te adinga thu phamawh/ hanthotna khat peuh pen Zo minam dangte adingin thu huat huai peuh hi suak zawsop thei hi. Tua hi a, thu khempeuh hong puak lo hi ing.

 

Zonet member teng lak pan kei pen a tavai pen, ka omna mun galmuang lo, dipkuapi-a ka om hun  zong om zel hi. Lam khat pan, minam nasepna-ah Mizoram pan a kipia mi kisam mahmahin kei  minam a it khat leh a seem thei ka hih ciang  ci-in ka tavuan bangin ngaihsunin a kipia ka hi hi.  Mizoramah internet zat man Rs.100 per hr. hi zen hi.

 

Group min ding pen a min thupi masa lo zawin, lung kituak teng na i sepkhop theih ding thupi masa zaw sa ing. A min pen (Neisok, Phualva, Deksuai etc.) khat peuh hoih sa ing. Minam min mah ci ni i cih leh Ciimnuai, Tedim, Eimi cihte pen ken Zolawkta ah ka zatnop ngei loh hi. Ciimnuai mi, Tedim mi, Paite mi, Eimi etc. a kizatnate-ah Zomi zangin, tua lo teng pen Zo minamte(Falam Zo minamte etc.) cih bangin zang zel zaw ing.

 

Minam kician khata a kingaihsun i hih manin i minam min pen Zomi cih bek na zang ing. Minam min ah i buaibuai lai leh minam makai dingin i  lungsim a cingtaak lo, i mipi dingte Zomi a hi lo a dang om ding hiam? Ciimnuai maw, Zomi i makaih sawm? Ciimnuai, Tedim, Paite etc. cih peuh sangin Zomi mah tel zaw ing. A limlimin Ciimnuai, Tedim, Paite etc. cih kammalte a pian ma pekin i minam om khin zo hi. Hih thu kong gen deudau manin Group thak sungah hong hel loh lawh tuan kei un maw!!(Hih vai saupi gen ding om lai ing.) Thu duhhop kha zel ing.

 

------------