SAWRKAR DAN SIAM DAN

(Procedure of Legislative Enactment)

 

Mipuite siam Sawrkar kan tih mai thin (Democratic Republic Government)-ah reng reng chuan Sawrkarin thil ropui tham deuh leh mipui tam tak chhawr theih tur emaw te leh thil dang, fel thlerh thlawrha tih ngai chite a tih dawn reng rengin, chutiang thil a tih tak tak hma chuan, chutiang thil tih dan tur ruangam leh chutiang hnathawktute hlawh leh hna an thawh huna awm an hman tur kha an hman dan tur te, chutiang dan bawhchhia an awm thulha an chunga kut thlak theih dan tur ruahmannate an siam hmasa vek thin a; a hmanhmawh thlak avanga dan siam hmasa lova thil lo tih ngai a awm avanga thil tih a awm pawhin a hnuah tal dan chuan a zui leh tho thin a ni. Chuvang chuan mipuite siam Sawrkarah chuan hnathawktu hlawm lianpui pui pawl thum, Dan Siam Pawl (Legislatures) leh Dan hmanga hnathawktu Pawl (Executives) leh Dan bawhchhiate chungthu ngaihtuaha rorelsaktute Pawl (Judiciary) an awm thin a. Tuna kan sawi tur hi Dan Siam Pawl (Legislatures) te hmalak dan a indawta rem chhoh a ni.

 

2. Dan siamna tura thil tul hmasa ber chu, dan siam chhan tur ber, thil lo awm tura kan duh ruahmanna (Policy) a ni a. Entirnan, Mizoram khawpui hrang hrangah hian Khawpui chhung enkawla roreltu tur (Municipal Bodies) siam chu Sawrkarna siamtu Political Party-te tha tih zawng ni ta sela, Municipal Bodies din dan tur Municipal Bill an buatsaih phawt tur a ni. Chutiang bawk chuan Sawrkar laipui lama sum dil chhuah inthiamsiak ringawt hi zawng a tha lo ve, kan ram chhungah ngei hian sum tam zawk kan hai luh theih dan tur hi i ngaihtuah teh ang, chhiah kan tipung ang nge, sumdawnna thil chi hrang hrang kan dinin thlai chin lam leh ngaw a thil chi hrang hrangte hmang hian Industry kan din ve em ni ang kan ti a nih pawhin chutianga tih tur chu ngunthluk deuh hleka ngaihtuah hmasak a, tih tak tak theih tur chi a ni dawn awm em tih te leh tih tak tak duhna kan nei em tih chu Sawrkarna siamtu Political Party-a an High Command emaw, Executive Committee chuan a ngaihtuahin Policy a siam phawt tur a ni. Chutianga Sawrkarna siamtu Political Party chuan Policy-a an neih chu a taka chantirna tura dan atana thu ruahman (Bill) siam tur chuan Sawrkar Department-a an hotu lu ber, Chief Secretary hnenah emaw chu dan hmang tu tur Department Secretary emaw hnenah chuan chu dan hmangtu tur Minister chuan a hrilh ang a, tihpuitlin an duh chhan leh tihpuitlin dan tur te a sawipui vek hnuah Bill chu a hmangtu tur Department chuan an duang ang a; chu Bill-ah chuan dan hming put tur te, chu dan lekkawhna hmun tur leh a huap chin tur te, chu dan hman tan hun tur te, chu dan hmangtu tur te leh mipui nawlpui, chu dan lo hmelhriat ve hrim hrim duh te hovin harsatna tawk lova chu dan chu an hriat theihna tura chu dana thu khirhkhan deuh hrilhfiahna te, chu dan hmanga hnathawktu tur te leh chutiang hna thawk tura thiam ngai chi sawifiahna te, a nih loh vek pawhin chutiang hna thawk tura lak theih loh tur mite zawk leh sum hman tur te, sum hman dan tur te leh thil tisual hrem dan tur te, thil tul awm chi thil chi hrang hrangte chu Bill-ah chuan tihlan tur a ni dawn a ni.

 

3. Chutianga Sawrkar Department pakhatin dan a siam tur, dan ruangam (Bill) an siam chu dan ziak dan tur ang taka ziak leh a rem vel dan tur dik taka chuktuah khawma remfel that a ni em tih te, chu dan chu siam la ni ta sela, dan dinglai sut buai a nei ang em tih te leh dan awmsa a lo awm tawh reng em? Dan awm tawhsa chu nge dingchang ang a, dan awm tawhsa nen chuan engtia her rem chi nge ni ang tih te thlenga thurawn, an lo pek theih nan, chu Bill chu Law Department emaw, chu ram (State Sawrkar) hming sak dana zirin Legislative Department emaw, Legal Department emaw hnenah thawn tur a ni a. Law Department emaw Legislative Department emaw Legal Department emaw te chuan dik leh tha tawka a hriat hnuah, chu dan chu an endik a, pawmtlakah an ngai tih an hriattir ang a, sum tam tak hmanralna tur emaw, a nih loh vek pawhin sum tam tak hailuh theihna tur emaw a lo nih pavvhin State Finance Department hnenah, anniin sum hman dan chungchang an lo en ve theihna tura thawn ve leh tur a ni. Law Department leh Finance Department-in an endik a, tha tawka an hriat a, an pawmpui thu an hriattir hnuah chu Bill chu Council of Ministers thutkhawm hunah, an tum dan ang takin chu Bill chu siam a ni em tih an lo en theih nan thawn leh tur a ni a. Council of Minister-in sawisel lai deuh an nei a nih chuan, Council of Ministers duh ang tak chuan her danglam tur a ni mai. A tul a nih chuan a bul atangin an siam tha leh vek ang a, Law Department leh Finance Department te pawh rawn nawn leh mai tur a ni. Council of Ministers (Cabinet Meeting tih pawhin an sawi bawk thin)-in sawisel emaw, siam that ngai emaw an hmuh loh chuan chu Bill chu Final Bill-ah ngaih theih nghal a ni tawh ang.

 

4. Final Bill chu chu ram (State) chhunga Legislative Assembly member awm zat let hnih aia tam deuh siam a, Legislative Council awmna State ah phei chuan chu aia tam chu siam tur a ni ang a. Legislative Council awm lohna State-ah chuan Member of Legislative Assembly awm zat let hnih aia tlem lo chu Speaker of Legislative Assembly hnenah thawn tur a ni. A chhan chu, kha Bill kha Member of Legislative Assembly tin te hnenah, a fal emaw, an member nihpuite nen emaw a an lo zir lawk tura pek vek tur a ni a, member thenkhat, an Bill dawn hloh palhte leh chu Bill an sawiho dawn nia rawn ken theihnghilhte hnena pek leh tur daih zan a awm tur tihna a ni ber.

 

5. Chutianga Final Bill, Cabinet Meeting-in an pawm tawh Speaker-in a lo dawn tak chu, chu Bill ngaihtuah ho tura pharhna tura ruat hunah chuan, chu Bill buatsaihtu Department enkawltu Minister chuan, Legislative Assembly Speaker-in chu Bill pharh tura phalna a pek veleh Member of Legislative Assembly zawng zawng hnenah chu Bill chu an sem vek ang a; Member tinte chuan chu Bill chu lain hun tiam chhungin an lo chhiarin a thatna lai te, a that tawk lohna lai te, tha lo deuhva an hriat lai siam that dan tur rawtna siam thei khawpin an lo zir tur a ni. Chuvang chuan, hetia Member-te zir tura Bill pek chhuah chhung zawng hi "First Reading" an vuah a ni. Chutianga Bill lo zir lawk theihna tura ni tiam a ral hunah chuan Speaker hnenah chu Bill neitu Minister chuan House chhunga sawiho a dil ang a; Speaker-in sawiho (discussion) phalna a pek veleh chu Bill chu Member of Legislative Assembly zinga sawi duh nei apiangin an sawi ang a; chu Bill neitu Minister leh Speaker tih chauh loh chuan thaa an hriat dan te, tha tawk lova an hriat dan te, siam that ngai an tih lai leh siam that dan tura rawtna te pawh an sawi thei ang a; a duh chuan chu Bill chu a hranga hraia en chianga ngawrh taka zir turin Select Committee din pawh an rawt thei a ni. Hetianga zau taka sawihona hi "Second Reading" an vuah a ni.

 

6. Bill thenkhat chu Member of Legislative Assembly tam tak chuan sawi ngaihna pawh an hriat mang hauh loh, chu Bill chu an han chhiar ngial pawha a awmzia an man phak mang loh te a awm ve thei a. Chutiang hunah chuan chu Bill chu mi thiam, chutiang lam kawnga Member-te finchhuah theite nena sawihova zirho turin Select Committee hnenah an pe thin a ni. Select Committee chu Speaker-in Member-te zinga engemaw zat, an dan hman laiin an tam lam tur a bithliah zat, Ruling Party leh Opposition Party member-te nena thlan pawlh leh official, dan lam thiam mite an ruat thin a ni. Chutianga Select Committee-in ngun taka zir hova thaa an hriat dan anga tihdanglam ngaia an hriatte tihdanglam tura an rawt hnu chu, a pumpui thua siam that vek a ngai a nih pawhin, Select Committee rawt dan ang chuan kal tlangpui mai tur a ni a, chu dan chu kaltlangpui theih tur chi a nih chuan Legislative Assembly-ah chuan sawi ho leh tawh lova pawmpui tura kal tlangpui mai theih a ni. Chutianga Select Committee rawtna chu, chu dan pawmpui zawnga kalpui theih a nih loh chuan, a bul atanga tan leh tur a ni ang. Chu Bill chu kaltlangpui theih a nih chuan, Bill dang ang bawkin chu Bill neitu Minister chuan Speaker hnenah pawmpui a dil ang a. Speaker chuan chu Bill chu pawmpui duh apiangte leh pawmpui lo tura rawtna hun pawh a siam leh ang a. Chutianga pawmpui (pass) chungchang sawihona chu "Third Reading" an vuah a ni. Chutianga sawiho zawhah chuan chu Bill chu Member-te zinga a tam zawkin pawmpui an rawt chuan an pawmpui (pass) ta a. Speaker chuan pawmpui a nih thu a puang ta nghal thin a ni.

 

7. Chutiang chuan Legislative Assembly-ah chuan chu Bill chu pawmpui (passed) ni tawh mahse, dan puitling tak taka sawi theih (Act) a la ni ta lo cheu va. Dan puitling tak tak a lo nih theihna tur chuan Legislative Assembly khaipa ber, State Governor-in a lo en ve leh phawt a, a pawmpui tih entirna tura a hming a lo ziak hnan (assent) a ngai a ni. Governor-in a lo en ve leh vek a, pawmpui theih nia hriaa a hming a lo ziah hnan chuan chu Bill chu Bill ni zui zel tawh lovin "Act" tih tur a lo ni ta a ni. Governor-in a pawmpui hma zawng khan chuan, State Legislative Assembly-a member zawng zawngin pawm vek mahse, "Act" tia vuah theih a la ni lova, "Passed Bill" a la ni chauh a ni.

 

8. Dan thenkhat chu State Legislative Assembly Member tam zawkin pawm mahse, Governor-in a pawm lo thei a. Chutiang hunah chuan, ngaihtuah that leh turin a thawnkir thei a; President of India hnenah a thawn thei bawk a ni. President pawh chuan chu dan chu a lo en a, pawmpui nghal mai chi nia a hriat loh chuan Legislative Assembly-in an lo ngaihtuah nawn leh turin a thawnkir thei a. Chutianga President pawmpui tura thawn, President-in ngaihtuah that leh tura a thawnkir leh chu, President-in a pawmpui theih loh chhan a sawina lehkha an hmuh ni atanga thla ruk chhungin an ngaihtuah tha ang a; ngun taka an ngaihtuah nawn leh hnu chu tidanglam deuhin emaw, tidanglam chuang lovin emaw President hnenah chuan thu tawp a lo siam hnan tura thawn leh tur a ni.

 

9. A chang chuan thil hmanhmawhthlak bik a awm thut avanga dan siam dan phung pangngai zawm lova ram puma hman tur ni ve tho si, dan hmanhmawh (Ordinance) siam a ngaih chang a awm thei a. Chutiang thulhah chuan India President-in Constitution of India, Article 123-na tlawhchhan leh State Governor-in Article 213-na tlawhchhanin chutiang dan hmanhmawhthlak bik chu an siam thei a. Amaherawlichu, hetiang dan hmanhmawhthlak te hi siam a nih atanga Legislative Assembly emaw, Sawrkar laipuiah chuan Parliament, dan siam tura an thutkhawm leh ni hmasa ber atanga chhiara kar ruk ral hmaa Dan Siam Pawl pangngai, State Sawrkarah chuan Legislative Assembly leh Sawrkar laipuiah chuan Parliament ngaihtuah tura Bill buatsaih leh a nih loh chuan, chu State Legislative Assembly emaw Parliament, dan siam tura an inkhawm leh ni hmasa ber atanga chhiara kar ruk a ral chuan, chu dan hmanhmawh chu a rial ral ve tawp ang a, dan a ni zui zel thei tawh lo vang. Chuvang chuan India President-in emaw, State Governor hovin emaw dan hmanhmawh an siam chu, dan atana chhawm zui zel tlak a nih phawt chuan, a tunnun zui zel nan, Dan Siam Pawl in, dan siam tura an thutkhawm leh huna an ngaihtuah hman tura Bill siam ngei ngei a ngai thin a ni. Hei hi tu mimal mahin thuneihna pumhlum hmang lova thuneihna insemrualna leh inlal chhawk dial dial theilina tura Constitution duangtuten an lo duan, khawvela Constitution tha bera vuah tlak nei kan nihna chhan pawh a ni.

 

Source:

DAN LEH HRAI (Legal Awareness Magazine), Vol. VII, Issue 10, March-April 2007, A legal Services Authority Publication, Aizawl

 ---------------