DAN RUANGAM (LEGISLATIVE BILL) BUATSAIH DAN

(Legislative Drafting)

 

State Legislative Assembly-in an rama hman tur dan siamte zinga a tam ber chu Sawrkarna siamtu Political Party Policy atanga rawn intan a nih thin dan leh chutiang dan ruangam buatsaih chu, chutiang lam changtu Sawrkar Department­a Officer-te chan a nih thin dan kan sawi tawh a. Tunah chuan, dan ruangam (Legislative Bill) buatsaihtu mi hrang hrangin dan ruangam an buatsaih dawna an hriat fo tur thu pawimawh han pho chhuak leh ila a tha awm e.

 

Dan chi hrang hrangte hi a hmangtu tur mipui tam dan azirin leh sum leh pai vir tuak vel tur a tam dan azirin buatsaih uluk a ngai hlei hle a. Mi tlemte chauhvin an hman tur chi dante chu chipchiar lutuka siam a ngaih loh laiin, mi tam tak hman tur leh sum leh pai tam tak hmanna tur emaw, sum leh pai tam tak siamna tur dante chu uluk tak, fimkhur tak, chipchiar leh intlawhkhalh tlata amaha ding vah theih awm khawpa kimchang tura duan a ngai thin a ni. Engpawh ni se, dan chi hrang hrang kan buatsaih turte chuan, thil inang khat, dan mawl leh tawikim emaw, dan sei leh chhah tham a ni emaw, a nih pawhin hlawm thuma then hran theih an ni thin a. Chungte chu (1) Thuhmahruai (Preliminary) (2) A dan tak (Body of the law or Statute) leh (3) A tlangkawmna emaw, a hmawr bawkna (Conclusion) te an ni. Chipchiar zawk deuhva tihdan tur sawi hmain, dan buatsaih chungchanga rilru hmang hnem tawh zawkte thuchang lo thlir hmasa leh phawt ila.

 

Institute of Judicial Training and Research, Lucknow, Uttar Pradesh-a Legislative Drafting Training tura ka zuk kal chuan, kan hotute chuan hla pakhat hi ni tin deuh thaw min chham khumin Training-a kalte tana kaihhruaina lehkhabu an siam (Brochure} zawng zawng deuh thawah chuan an ziak bawk a, chu hla chu hei hi a ni :­

 

"We are Parliamentary draftsmen,

We compose our country's Laws;

Of half the litigations;

We are undoubtedly the cause."

 

mizo tawng chuan –

 

"Kan ram mi tin ze tin huap tur,

Dan hrang hrang duangtute kan ni;

Kan sul hnu dawn kir hian maw,

Thubuai hlabuai zawng zawng zatve vel hi

Kan pawlawh thin vanga irhchhuak an lo ni e. "

 

tihna a ni ber mai. Chumi awmzia chu dan ruangam buatsaihtu mi hrang hrangte hian kan ram chhunga mi chi hrang hrangte chunga leklam vel tur dan kan siam lai hian uluk tak leh fimkhur taka hun rei tak thlenga thil lo awm thei turte ngaihtuah lo leh kan tawngkamte pawh awmze pahnih emaw, chu ai pawha tam zawk kawk thei kan hman thin avangin thubuai leh hlabuai, dik nia inhriat theihna leh mi dangte dik lo leh dan bawhchhiaa va ngaih theihna a hring nasa a; inchuh tur a ti tamin thubuai zawng zawng zatve zet hi chu a dan ziakna thufiah tawk lo leh pawhsawih theih a tam thin vang niin an hria a ni. Chuvang chuan, dana hman tur tawngkam chu awmze pakhat chauh neia hman ni fo se thain an hria a, chutianga hmang thin tur chuan min hrilh n gun hle a ni.

 

Chu Institute of Judicial Training and Research-a an Honorary Director, Justice K.N. Goyal chuan min zirtir tura a lokal tum chuan,

 

"Dan siamna tawngkam atan hian chuan mi tawngkam hman hawhsak ve pawh a pawi lo va, dan awm tawhsa a mi entawna ziak thiam phei chu a finthlak hle zawk a ni. Tin, thu pakhat awmze pahnih emaw, chu aia tam kawk thei chi chu hman hauh loh tur a ni. Entiman, "Ship" tih hi "lawng lian tham deuh chi" sawina atana kan hman chuan, chu dan pumah chuan Ship tih hlir hman tur a ni a; tawngkam tih mawi vel tumna avanga Vessel tih angrenga thlak kawi kual vel tur a ni lo. " a ti a ni.

 

Chuti chuan, dan ruangam buatsaih laia kan hriat ngei ngei tur leh a indawta kan tih dan tur pawh hetiang hian min zirtir a. A hmasa berah chuan, dan atana kan duan tur thu (subject) chu State Legislative Assembly siam theih tur chi (Legislative Competency an neihna) a ni em tih hriat nan Indian Constitution-a Seventh Scheduled, List II leh List III-te en hmasak a, State Legislative Assembly-in dan siam theihna an neihna chiah chauh dan ruangam chu siam tur a ni a. State  Legislative Assaembly siam theih loh tur chi duang tura thupek kan nih palh hlauh pawhin, chutianga State Legislative Assembly thuneihnain a tlin phak loh a nih thu chu kan Minister-te hnenah chuan hrilh mai tur a ni.

 

A dawtah chuan, dan siam kan tum lai mek kha, a anpui emaw, a hrula mi emaw dan dinglai leh hman pawh hman lai mek a lo awm reng em tihte ngaihtuah tur a ni a. Chutih rual chuan, chutiang dan thar siam kan duh chu dan dinglai tlema siam that hret emaw, dan dinglai hnawl veka siam that tura hmalak chi em ni ang tih pawh ngaihtuah tur a ni. Chutianga dan dinglai chu a lo awm reng a, chu danah chuan zeh luh mai chi a ni nge, a dan hming thlakthlenga siam rem chi tihte ngaihtuaha tihdan tur remchang ngaihtuah pui turin hetiang lama mi thiamte pawh rawn fo thin tur a ni.

 

Chutianga vawi khat rilru leh ngaihtuhna hmanga han duan pawrh hnuah chuan dan chi hrang hrang hrilhfiahna lehkhabu (Law Journals)-te en leh a tha a. A chhan chu, kan dan siam tum dan ang chi kha hnaivai takah Supreme Court-in emaw khawii lai High Court-in emaw a lo hnawl hlim hlawl a lo ni reng em tih hriat a tul tlat a ni. High Court leh Supreme Court-te hi Court of Records an nih avangin dan hman dan dik leh dik lo chungchanga hman theih vek an nih vang a ni. Chutianga dan bu dangte leh Law Journal-te en hnua siam that ngai a awm chuan Administrative Department-a Senior Officer-te berawna siam that paha Second Drafting buatsaih theih a ni ang. Siam that ngai a awm loh erawh chuan, kal tlangpui theih a ni ang. Chutianga rawn awm mite rawn kual hnua siam that a ngaih loh chuan Cabinet Memorandum siama, Council of Ministers, dan siam chungchang ngaihtuah tura an thutkhawm huna an ngaihtuah tur chuan Parhamentary Affairs Deparment kal tlangin Cabinet and Political Department-ah thawn tur a ni. Council of Ministers-in an lo chhiar a, siam that ngai an hmuh chuan, siam that dan tura kaihhruaina an siam ang chuan Final Drafting siam theih a ni tawh ang.

 

He Institute of Judicial Training and Research­a Faculty member pakhat, Justice J.K. Mathur chuan, "Dan ruangam pakhat buatsaih nan hian ni li ni nga lai khawh ral pawh a pawi lo va, dan tha leh hmantlak siam theihna tur chuan ni khatah clause thum emaw clause li emaw lek buaipuipawh a pawi lo, "a ti a ni.

 

Hetih Iai hian Guest Faculty atana an sawm ni awm tak, Judicial Officer hna chu thawk ngai reng reng lo, Advocate pawh ni chuang lo, dan chi hrang hrang erawh chu thai let hnem em em tawh tih a tawngkam atang pawha hriat mai theih, engtik lai emaw khan chuan Law Commission of India-ah pawh Member pathumte zinga pakhat ni ve phak, lehkhabu pawh engemaw zat ziak tawh, pumruaah chuan lian teh zuah bik lo tak, P.M. Bakshi chuan, tha tak leh belhchian dawl taka dan ruangam buatsaih dan hetiang hian a sawi a. "Dan ruangam (Legislative Drafting) tha taka duang tur chuan heng a hnuaia thil pathum hi ngaihtuah reng a ngai a; chungte chu:­

 

(1) Kan tih tur leh tihdan turah kan chiang tawk tur a ni.

(2) Kan tawngkam hman tur chu mawl leh fiah thei ang ber, tawi fel kan thlang thin tur a ni.

(3) Tawng tualleng leh hman lar tawh sa, dan siamna tawngkamah emaw, rorelna tawngkamah emaw, Supreme Court leh High Court pawhin an lo hman fo tawh thin te hman thin tur a ni.

 

A chunga tihdan tur te hi he tiang hian sawifiah belhchhah leh deuh ila a tha awm e. Tih tur leh tihdan tura chian tawk chungchangah hian dana hman tur dan ruangam buatsaihtu chuan Sawrkar duh dan a hriat chian hle a ngai a; chiang taka hriat theih turin Sawrkar pawhin thu mum (Policy) a nei bawk tur a ni tihna a ni. Chubakah chuan chutiang dan chu Legislative Assembly-in amaha a siam theih chi a ni nge Parliament-in a pawmpui tura siam chi tih te hriat chian a ngai a, chutianga an tih tur an hriat chian theih nan chuan dan ruangam duangtu chuan Indian Constitution a hriat bel viau pawh a ngai tihna a nih chu.

 

Tawngkam mawl leh fiah thei ang ber hman tih awmzia chu, thu un pui pui leh tawng upa (idioms and phrases) te, hla thu (poetical words) te hmang lo leh tawngkauchheh inzawm zut mai (compound or complex sentence) hmang lova tawngkam mawl, naupangte pawhin an hriatthiam nghal mai theih tur chi (simple sentence) hman tur tihna a ni ber. Tin, dan ruangam kan duang a ni tih hre rengin tawngkam nem leh thawitham, ngaihtuah uluk ngai taka thu sawi dan (Passive Voice) hmang lova, hrilhfiah ngai lova hriatthiam nghal mai theih (Active Voice) hman fo zawk tur a ni. Entirnan - "There shall be established a Commission" ti lovin "The State Government shall established a Commission" tih zawk tur a ni tihna a nih chu. Dik tak chuan, a eng zawk zawk mah hi a hlirhlang chuan a hman theih loh ve ve a; amaherawhchu dan ruangam buatsaih nan chuan Passive Voice ai chuan Active Voice hmanga thu ziakin a fiah hma deuh thin a ni.

 

Tawng tualleng leh hman lar tawhsa hman tih kawngah hian, a theih chenah chuan Court hrang hrang pawhin rorelna tawngkam atana an hman tawh thin chu hriatthiam a awlsam avangin dan thu ziak nan leh han duan vel nan chuan a tha tihna a ni ber a. Tawng tualleng, hman lar em em ni mahse tawngkam uang thuang (slang), engtikah emaw chuan reh leh mai tur chite leh tawngkam mawi lo, uar lutuka thu sawina ang chite chu hman loh tur a ni. A theih chinah tawngkam mawi leh zahawm thupui hlapui vai ni a kan hman ang chite hi dan ruangamah chuan hman fo zawk tur a ni.

 

Chuvang chuan dan ruangam kan buatsaih reng rengin kan sulhnu ennawn leh a tul dan anga siam that deuh reng pawh hreh tur a ni lo. Tin, kan aia themthiam zawkte entir pawh zahthlaka ngaih tur a ni lova; tin, min siam that sakna tura kan ziaksa min thaichhiatsak te pawh phal fo tur a ni. Chutianga siam that a remchan theih nan chuan a tirah khawlchhuta a tlar pangngai aia kar awl zau deuh emaw, kut ziak pawhin a kar awl zau deuh (double spaced emaw triple spaced emaw hial pawha ziak a finthlak hle a ni. Tin, mi ziaksa endiktu emaw lo enpuitute erawh chuan pentui nei leh ball pen ilova mi kutchhuak thaichhiat sak buaih buaih lovin, pencil hnip leh lang fiah thei, zum taka zum a, dimte a chhiar theih tawka fiah si a chutiang mi thu ziakte chu siam that sak tur a ni: tihsual palh a lo awm thulha hruk reh leh a awlsam nan leh a dik lo emaw tih lo dik reng si tundin nan a remchang em em a ni. Chutichuan, dan ruangam chi hrang hranga awm thin leh hriat atana pawimawhte Justice G.B. Singh-a'n kaihhruaina a siam anga han remin, Mizo tawngin han sawifiah ila a tha awm e. A hmasa berah chuan a bul atanga a indawt dan tlangpui han tarlang ila. Dan ruangam chi hrang hrangahte hian hetiang hi a indawta an rem chhoh thin dan chu a ni :­

 

1.    Long title

2.    Preamble.

3.    Enacting formula

4.    Short title, extent and commencement

5.    Definition

6.    Principal provisions

7.    Administrative provisions

8.    Penal provisions

9.    Miscellaneous clauses

10.  Rule making clauses

11.  Repeal and saving clauses

12.  Schedule

 

Heng a indawta dan ziakna tawngkam kan han tlar te hi han sawifiah zui ila.

 

1. LONG TITLE :

Long Title tih chu Mizo tawng chuan, a hming sei tihna ni mai awm tak a nih laiin chutia han sawi mai chi chu a ni hauh lo. A awmzia tak chu chutiang dan kan siam chhan bulpui tak, dan kan siam avanga thilthar rawn indin chhuak tur emaw, dan dinglai siam thatna a nih pawhin chu dan siam avanga thil a tih danglam tur thu sawina, chu dana a serh zinga a mei ang tlata pawimawh chu a ni. Long Title entirna a hnuaia ka han ziak te hi Mizo tawnga lehlin kher chu tul lovah ngai ila.

 

A Bill to provide for the regulation of mines and the development of minerals under the control of the Union.

 

tih emaw,

 

A Bill to provide for fixing minimum rates of wages in certain employments tih ang chi, dan hming hawrawp puia ziak hnuaia dan thu bul leh a intanna thu hlawm, sentence khat emaw leka an dah thin hi Long Title chu a ni.

 

2. PREAMBLE :

Hman laia an uar angin tun lai chuan Preamble hi an dah ziah ta lem lo va. Preamble-in a entir chu, chu dan siam a tul avanga siam a nih dan sawina a ni ber a. Long Title-ah fiah taka ziak a nih tawh chuan Preamble dah nawn leh hi a tul hle lem lo a ni.

 

"Whereas it is expedient to provide for fixing minimum rates of wages in certain employment:

 

It is hereby enacted as follows"

 

tih ang chia ziak hi Preamble an tih chu a ni.

 

3. ENACTING FORMULA:

Enacting Formula han tih chuan chu dan siamtute siam kum leh chutianga dan siam tura thu an neih dan tarlanna, dan ruangam siam apianga ziah tel ngei ngei ngai, a serh zinga a mei ang tih chi, chuvanga Enacting Formula vuah hial chu a ni. Entirnan –

 

Be it enacted by the Parliament in the Fifteenth Year of the Republic of India

 

Tih emaw

 

Be it enacted by the Mizoram Legislative Assembly in the Fifty Eight Year of the Republic of India tih ang chi hi a ni a. Dan siam zawh tawhsa sawrkar chanchinbu (Official Gazette)-a chhuah tur a nih tawh hnu erawh chu "Be it enacted" ti zui zel tawh lovin

 

It is enacted by the Mizoram Legislative Assembly in the Fifty-eight Year of the Republic of India tia ziak tawh zawk tur a ni. Dan siam zawh tawhsa ka han tih hi Assembly-in a pass tawh, Governor-in a pawmpui tawh hnu tihna a ni.

 

4. SHORT TITLE EXTENT AND COMMENCEMENT:

Short Title hi chu a dan hming put ber kha a ni la thung. Entirnan –

 

This act may be called the Minimum Wages Act, 1948 tih te, This Act may be called the Mizoram Civil Courts Act, 2005 tih ang chite hi Short title chu an ni.

 

Extent awmzia chu chutiang dan hman theihna tur ram chin sawina chu a ni. Entirnan, dan pangngai (Bill or Act)-ah chuan - It shall extend to the whole of Mizoram tih ang chite hi Extent chu a ni a. Dan chipchiar zawk (Rules)-ah chuan, pakhat aia tam an nih tawh thin avangin "They shall extend to the whole of Mizoram" tih a ngai thin a ni.

 

Commencement tih chu chutiang dan hman tan hun tur sawina chu a ni. Entirnan - dan pangngai (Bill or Act)-ah chuan - "It shall come into force at once” tiin emaw, It shall commence on the date of publication in the Official Gazette tiin emaw, It shall commence on such date as the State Government may by notification in the Official Gazette appoint tiin emaw an dah deuh ber thin a ni.

 

5. DEFINITION SECTION:

Definition Section hi dan kan han duan a, thumal thenkhat, hrilhfiah loha hriatthiam nghal mai theih loh chite leh thumal tlanglawn tak pawh nise chutiang dan leklam vel huna chutiang thu hman dan tur sawifiahna a ni ber a. Chuvang chuan kan dan duan meka kan hman tel hauh loh te he section-ah hian telh ve tur a ni lo va; tin, kan thumal hrilhfiah tur chu Dictionary a rem dan ang hian a hawrawp hmasa ber indawt dan (A B G emaw A AW B emaw) a rem ve vek tur a ni.  Kan dan buatsaih chu mi tam tak hman tur, dan sei leh chhah tham tak, section zahnih zathum chuang zeta sei tur angah te chuan hrillrifiah ngai a tam dawn avangin General Clauses Act, 1897-in a dan chi hrang hrang, hrilhfiahna atana hman tur dan tawngkam hrilhfiahna a lo siam tawhsa chu ring a, a hranga hraia hrilhfiah vek ngai lovah dah mai a pawi hauh lo. Chuvang chuan he definition hi dan pum puia thu hman hrilhfiah ngai bik te hrilhfiahna tur a nih avangin, a tirah chuan dah awl hrih a, dana thu hman zawng zawng hman vek tawh hnuah, hrilhfiah loh avanga buaina awmtir thei awm chinte chauh hrilhfiah tur a ni.

 

6. PRINCIPAL PROVISIONS:

Principal Provisions hi kan dan ruahman laipui leh a pawimawh lai ber tur chu a ni ta a. Kan dan siam pawimawh dan leh hmangtu tur an tam dan azir te, sum leh pai vir tuak vel tur a tam dana zirin chipchiar tak emaw, mawlte emaw pawha buatsaih theih a ni, chuvang chuan kan dan hman laite hi a insei hleih hlawm hle a; Indian Companies Act, 1956 (Central Act No. 1 of 1956) te chu section 600 aia tam a awm laiin mi pakhat chauh tana siam, The Mizoram (Salaries and Allowances of Leader of Opposition) Act, 1991 te chuan section l3 chauh a nei a, the Mizoram (Salaries and Allowances of the Deputy Chief Whip) Act, 1991 pawhin section 13 chauh a nei a. Mak ang reng tak chu mi tam tak hman tur ni ve tho, Mizoram Urban Areas Rent Control Act, 1974 chuan section 10 chauh a nei lawi a ni. He section hi a pawimawh lai ber tih mai theih thawthang, kan dan siam azirin hmun awh hnem lai ber tur a ni kan ti thei ang. Dan chi hrang hrang a inan loh em avangin a sei dan tur te, chu laia thu awm tur te entirna siam theih a ni lo a ni. Chutih lai chuan danin thil thar a rawn awmtir thil chi hrang hrang, sum leh pai leh a chelek dan tur te, sum hman dan endik chungchang leh Pension chungchang thlengin he laiah hian rem khawm theih a ni ang.

 

7. ADMINISTRATIVE PROVISIONS:

He lai hlawm hi dan kan buatsaih laia a laipui pakhat, chutiang dan kan buatsaih meka thuneitu hlawm din dan tur leh an thuneih dan tur te, chutiang thuneitute thuneihna leh ro an rel dan tur te, chutiang thuneitu a ruat emaw, thlan tur a nih pawhin thlan theih tur chin leh thlan theih loh tur chin te, chutiang thuneitu pawimawh thih thut leh dam loh nikhuaa a aiawha thil lo ti tur ruat theihna te, thuneitu lal dan indawta thil an tih dan tur te leh chutiang lam chi dahna tur chu a ni. Chutiang zelin thuneitute zinga dan bawhchhia an awm thulha hrem theih an nih chungchangte pawh he lai hlawmah hian dah theih a ni ang.

 

8. PENAL PROVISIONS:

He lai hlawm hi hnathawktu tute pawh, a lian emaw, a te emaw pawh dan bawhchhiaa thiam loh changte hrem dan tur sawina hmun tur a ni a. Engtia an awm leh eng thil an tihin nge dan

bawhchhia an nih tih te leh eng thil an tih lohin nge dan bawhchhia an nih tih te, dan bawhchhiate chungchang rel dan tur sawina tur a ni a. A tlangpui thuah dan bawhchhiate hrem dan turah a hrang a hraia hrem dan tur kimchang taka dah aiin Indian Penal Code, 1860 hmang tura dah leh an chungchanga thu kalpui danah pawh Criminal Procedure Code, 1973 hmang tura dah thiam a tha hle. Chutiang zawnga dah thiam chuan nasa takin hna a awl zawk dawn a ni. Amaherawhchu, Indian Penal Code-ah kan dan siam ang chi a awm lo thei ve tho va. Chutianga dan bik (Special Law) kan siam duh chuan, Constitution, Seventh Schedule a List II leh List III bawhchhe lo chuan dan bik (Special Law) chu kan siam thei tho bawk ang a. Chuti chung pawh chuan Criminal Procedure Code, 1973 hmanga ngaihtuah theiha siam chuan hna a awlsam phah dawn a ni.

 

9. MISCELLANEOUS PROVISIONS:

He lai hlawm hi dan bua ziah lan tel ve ngai, dan mal chi hrang hrang, dan kan siamah chuan Board emaw, Council emaw leh Local Authority dinna awm ta se, chutiang Authority, Board leh Council emaw Corporation-a hotute leh hnathawktu dang pawh Public Servant an nih thu te, a anpui deuh dan a lo awm palha dingchang zawk tur sawina te, dana thu inziak fakna awm lo thil a hnathawktu tute pawhin dan bawhchhiat tumna rilru nei hauh lova thil an tih te thiamchantir theih an nih thu sawina ang chite dahna tur a ni.

 

10. RULE MAKING CLAUSE:

Dan tam takah chuan chutiang dan anga hna han thawh tak tak dawna tihdan tur chipchiar leh fel tak ruahman ngai, a dan puiah han dah tel vek dawn se buaithlak thama thil tih tur tam phah em em tur a awrn thei a. Chuvang chuan, dan chipchiar zawk siam theih a nih tur thu leh chu dan chipchiar (rules) a dan an siam dawn huna an hmaih hauh loh tur te sawi a ngai thin a. Chutiang lam thu chu he lai hlawmah hian dah tur a ni. Rules baka Regulation siam a ngai a nih pawhin chutiang regulation siam a nih tur thu leh regulations siam huna mangnghilh hauh loh tur chin chu thailan tel nghal thin tur a ni.

 

11. REPEAL AND SAVINGS :

Hei hi dan awmsa paihhlawka a thar siam emaw, dan awmsa hrula a vaia paih chuang lova tawngkam dang deuh hmanga siam that huna dah tel chi a ni a. Dan thar hlakah chuan dah tel ve a ngai lo. Tin, dan hlui dan thara thlakthleng a nih pawhin, dan awmsa hmanga thil lo tih tawh leh tih mek, la tih zawh si loh te dan thar hmanga tih anga ngaih a nih theihna tura SAVINGS hi dah tel thin a ni a. Chutiang thil tih laklawh, chhunzawm ngai tur chi a awm lo emaw, chu dan hlui chu chhawmdawl tlak a awm lo a nih chuan Repeal and Savings ti lovin Repeal ti ngawta dah tur a ni.

 

12. SCHEDULE:

Dan zawng zawngah Schedule dah zel a ngai lem lo va. Dan thenkhat, dan pangngaia han zeh aia Schedule han siama hna awlsam zawk thei chi a awm a. Chutiangah deuh chauh chuan Schedule hi an dah thin a; chutiang chi danah chuan Schedule te chu chu dan bung danga mite ang chiaha ngaih an ni thin a ni. Entirnan - Indian Constitution-a First Schedule atanga Twelfth Schedule-a thu chuangte hi en ila, a bu chhunga dah nghal remchang lo a awm nual a ni.

 

Chutichuan, a bul lama sawi tawh ang khan, a hlawm hmasa ber, Long Title atanga Definition thleng hian Thuhmahruai (Preliminary) hian a huam a Principal Provisions atanga Miscellaneous Provisions thleng hian a dan laipui ber (body of the laws) chu a ni a. Rule Making clause atanga Schedule thleng emaw, Schedule nei lo danah chuan Rule making clause atanga Repeal and Savings thleng hian a hmawr bawkna emaw, a tlangkawmna (conclusion) chu a ni thung a ni.

 

Dan thu ziakna atana mahni pianpui tawng hman hi a har hle a nih a rinawm. Keini aia nasa fe a changkang leh hmasawn thui tawh Uttar Pradesh State pawhin Hindi ngata dan zawng zawng ziak chu harsa an ti ve hle tho mai a. Keini, British ho lo luh hma zawng chuan khaw hmun nghet pawh nei fumfe lova pem kual reng mai, ro leh thil hlu tak tak pawh nei lo, chuvanga rorelna tawngkam pawh nei mumal lo tan phei chuan kan tawnga dan thu lehlin pawh a khirh hle mai. Chuvang chuan kan pianpui tawng a tam thei ang ber hmang chungin, lehlin ngaihna awma ka hriat loh te Saptawnga dahin ka thiam tawkin ka han hrilhfiah ve a ni e.

 

Source:

DAN LEH HRAI (Legal Awareness Magazine), Vol. VII, Issue 10, March-April 2007, A legal Services Authority Publication, Aizawl

 ---------------