DELHI : LEIVUI KHUAPI

- J. Thang Lian Pau | April 15, 2010

 

 

Delhi pen India adingin a phualpi (capital) leh khua lian pen hi a, mihing tam lamah a nihna (a khatna Mumbai), leitungah a giatna ahi hi. 2007 kumin milip then 17 val teng a, zumkamin English, Hindi, Urdu, Punjabi cihte kizang hi. A zaina 1484 km2 hi a, tuipi pan a sanna 784 ft pha hi.

 

Old Delhi, New Delhi, Delhi: Delhi pen Yamuna gun beela a teengte in Topa Jesuh pianma, BC kumzabi 6-na hun pawla a sat uh hi dingin kituat hi. Delhi pen politik, cultural leh sumbawlna lamah damdamin khang toto a, Mughal Empire (AD 1649-1857) hun ciang Mughal gam phualpi suak hi. British ten 1912 kumin Calcutta pan Delhi-ah India phualpi tuah uh a, Delhi khuapi zong keek beh gawp pah uh hi. A kikeek beh teng ‘New Delhi‘ (Delhi Khuathak) a kicih ciang Delhi pen ‘Old Delhi’ (Delhi Khualui) suak hi. Delhi ciatciat-ah India phualpi a kingakna pen New Delhi teek ahi hi. New Delhi pen British architect, Edwin Lutyens makaihna tawh a kigeel (plan), 1920 kuma bawl a kipan leh 1931 kuma a kizo ahi hi.

 

Old Delhi leh New Delhi pen a kigawmin ‘Delhi’ ciin zong kilo thei hi. Delhi pen khuapi khat lah hi, India phualpi lah hi, gam khat (UT) lah hi kawm hi. Delhi-ah India gam bup kumpi leh Delhi gam kumpi omkhawm ahi hi. Delhi gam teng khua-in dim zong cih theih a, Singapore tawh kibang sim hi.

 

National Capital Territory of Delhi (NCT): 1952 kumin Delhi gam kumpi cih theih, Delhi State Assembly kiphut a, 1956 kumin kiphiat kik hi. 1966 kum pan 1991 kum dong Metropolitan Council ciang bek vaihawmna tawh om hi. 1991 kumin National Capital Territory of Delhi (NCT) ciin Union Territory (UT) dinmun ngah hi. Tua pan kumpi tuam neih kipanin India kumpi taangin Lt. Governor in vil hi. Delhi gam (NCT) kumpi vaihawmna innpi-ah seat (MLA) 70 om hi. Tulai taka kumpi a seemte pen Chief Minister, Pi Sheila Dixit’ makaih Indian National Congress party-te ahi hi.

 

India gamah kumpi dawl li – India kumpi, State kumpi, UT kumpi leh Autonomous District Council (ADC) kumpi cih bangin om suk hi. A niam pen ADC kumpi zong upadi bawl khuan ngah zah dongin a thuneihna uh maimai lo hi. Mizoram state sungah bang Lai leh Mara ten ADC kumpi nei uh hi.

 

National Capital Region (NCR): A lian a zai mahmah khuapite ‘City’ mai hi loin ‘Metropolitan’ kici hi. Tu hun ciang Delhi pen a kiima khuapi - Gurgaon, Faridabad, Noida (New Okhla Industrial Development Authority), Ghaziabad leh adangte tawh khen theih lohin kimat khin ta hi. Tua ahih manin ‘National Capital Region (NCR)’ a kici ziau Delhi Metropolitan Area in NCT pualam dong kihuamsak hi. NCR in a huam khak teng:-

 

 

     State/UT     Area  Total Area

1.

2.

3.

4.

N.C.T of Delhi

Haryana

Uttar Pradesh

Rajasthan

1,484 km2

13,413 km2

10,853 km2

7,829 km2

33,578 km2

 

 

 

 

Khuapi kivaipuakzia: Khuapi kivaipuakna ahihleh pawl thum - Delhi Municipal Corporation (DMC), New Delhi Municipal Council (NDMC) leh Delhi Cantonment Board (DCB) cih ten len hi. DCB in South West District sung, NDMC ten New Delhi District sung, DMC ten a dang teng sai hi. NCT sung teng District kua-in kidei a, District khat pen Sub Division thum ciatin kikhen sawn hi.

 

Vikas Puri Veng: Zomi tampi tak’ belh Vikas Puri veng pen West Delhi District sung leh Uttam Nagar Police Station huam sung hi in, Postal code ‘110018’ zang hi. Vikas Puri veng taanga tulai taka Delhi gam vaihawmna innpi-ah a kihel (MLA) pen Pu Nand Kishore ahi hi. Vikas Puri pan khawlak vakna-in bus na zatnopleh a nuaiate zui ta in:-

 

No. 883 : Uttam Nagar – ISBT kikal

No. 871 : Vikaspuri H3 – Shivaji Stadium kikal

No. 865 : Vikaspuri H3 – Nehru Place kikal

No. 860 : Vikaspuri H3 – Central Secretariat kikal

 

Leivui khuapi: Delhi a lamdan mahmahna pen tuma kum 3000 hun laia mihingte nuntaakzia muh theihin om lai hi. India in suahtakna a ngah 1947 kumin Delhi-ah mihing 14,00,000 a om pen peemlut a tam luat manin tun 1,70,00,000 val pha ta a,UP leh Bihar state pana peemlut bekbek zong 40,00,000 bang cing ta hi. Mihing leh mizawng tam luatna hangin khuapi buah in, bangkim leivui bang lo, leivui nam lo omlo phial hi. Zomite bel leivui baangin leivui nam sam kei ni maw? Zomite a kum a kuma i tenna hi buang a hihna tawh i belh leivui khuapi tangthu i theih kilawmsa-in, a toma kong gelh ahi hi.

 

-------------