KUM ZALOM THAK SUNGAH ZOMITE

- J. Thang Lian Pau | March,  2001

 

 

 

AD 2000 kum  pen kinialna tawh kidim ahi zongin AD 2001 kum pen hun thak (New Millennium / 21st Century) lutna hi limlim hi.  Leitung minam tuamtuam in hih hun thak hong tun pen ai damdam uh cih i thei ciat hi. Ahi zongin Zomite in lungdam-meipaakin hih hun thak muak i kilawm hiam? Hih hun thak in Zomite bang hong suah tam? cih pen i minam mailam ding a khualte adingin patauhna ding tampi om hi.

 

A beisa kum zalom in minam tampi tak thupha guanin a laptouh lai takin,  Zomite pen hih kum zalom in hong samsiat in,  ei leh ei a khangto i bat hang, namdangte tawh kitehin, kiniamkhiat mahmah a, i minam  hihna (identity or nationalism) nakpi takin khahsuahin, kum zalom 20-na nawk zo lo-a a zawm,  a lal dekdek i hi hi.   Tu`n a lipkhap huai zaw kum zalom thak sung a kilut hi leuleu a, hih hun sungin Zomite pen i khawsuah leh khawsuah, i khawsuah kei vanglak  leh a lalmang( minam bei)  suak ding kihi ta hi.  Minam mangthang cih pen a nuam hi loin, namdangte simmawh kithuak seemseemin, kigenthei seemseem ding cihna hi.

 

Hih tawh kisai in, German Language Society (March '96) suah, "Muttersprache" (Mother Tongue) in a genna-ah, tu`ma kum tulsawm hun laiin leitungah mi then khat (1,000,000) khawng bek omin, ahih hangin  tua hun laiin pau pen 10000-15000 kikal tak om hi, ci hi.  Tun pen leitungah mihing then tul guk (6,000,000,000) val kipha hi napi, pau pen 6000-7000 khawng bek nungta ta in,  hong tung ding kum za khat sungah pau za-a-sawmkua (90%) khawng lal lai dingin ki-tuat hi, ci hi. Alaska University Professor Michael Krauss in leitungah pau nam 300-600 kikal khawng bek khawsuak dinga,  adang teng lal khin ding ci hi.  Tu`n Australia-a pau kizang 200 lakah 135 pen lal mang khin zo hi, kici hi.

 

Hih thu pen Zomite in khawphawkna in zangin,  mikang ten "United We Stand, Divided We Fall,"   a cih bangin Zomite i khawsuahna dinga pangkhawma i ma i khuatkhop kei leh,  a malmal in kuamah   sawt kipang zo tuan lo dinga, i kiima minam lian zawte husa nawk zo loin kilal khin veve ding hi.   Leitung pen siat lam manawh a, ki-itna leh kihehpihna zong kiam tektek hi. Mihingte liangkou kikim ding leh Kipumkhat ding cih pen  a piang thei hi lo hi.  Kuamah ei tawh kikim dingin hong niamkiat  nuam ngei lo ding hi.  Kuama'n hong ngak lo dinga, hong taisan khin ding uh hi.  Mi I phak zawh ding kisam  hi.

 

Tua ahih manin ei sungah Kipumkhatna leh pankhopna a om theihna dingin minam min khat sungah kilom masak phot kisam cih pen pulakkik kul  zel   hi.  Tua pen ZOMI mah hi leh kizen pen ding hi.   Zo minam bup huamin zong "Chin" sangin "ZO" mah khawsuak  zaw veve ding hi. Bang hang hiam cih leh Zo minam tam pen omna Mizoram in cik mahin  "Chin" zang lo ding hi.  Tua ciangin mi pawl khatte in " Zomi" leh "Mizo" cih kikalah a buai zong om hi.  MIZO leh ZOMI pen kinialna ding a om kei a, SAVA leh VASA cih danin I zat dan tuak hi a, a deihna kilamdang lo hi.  Sava leh Vasa, Zozam leh Zamzo, Sangha leh Ngasa, Lamdang leh Danglam cih tawh kibangin  vasa a cite adingin ZOMI hiin, Sava a cite ading MIZO zat ding hi lel hi.

 

Tua ciang, Zomi hi hang, i cih kawmkalah mi pawl khatte in Zomi cih pen mualtungmi (Highlander) cihna hi, ci hi.  Hih pen dik lo hi.  Zomi cih pen taangtawng pana i masot i minam min hi.  Leitungah mualtunggam leh mualtunga teeng minam tampi om hi. Zomi cih pen Mualtungmi cihna hi leh Zomi in leitunga mualtungmi khempeuh huamin, Zogam in Mualtunggam khempeuh huam ding hi.  Ahi zong, leitungah ei lo Zomi i cih na loin, ei gam lo Zogam dang om tuan lo hi. Tua ahih manin tuipi tungah  i teeng zongin TUIPIMI, zanggamah i teeng zongin ZANGMI, khapi(moon) tungah i teeng zongin KHAPIMI a suak lo ding, i omna peuh tawh kizuia minam min a kikhel ziauziau thei lo ZOMI i hi hi.  I sisan kizoppih, khamtunggama khatvei zong a teeng ngei lo, zanggama teengte zong Zomi mah hi veve hi.  Tua ahih manin Zomi cih pen Zomi mah hi a, Paite kammal pianna Teikhang khua a kisat ma, Tedim khua a kisat ma, ciimnuai khua a kisat ma, namdangte in Chin hong cih ma peka Zomite ihi hi.

 

Kigawmkhawmna taktak pen Mizote hih dan mah kip pen leh kilawm hi. Mizo sungah a lut ding peuhmah in a biakna pawlpi leh kipawlna tuamtuam teng tawh lutkhawmin a tuam nei nawn lo hi.  Tu dinmuna Zomite kigawm sawm dan pen a pawtham bek hi lel hi.  Kigawm i ut taktak leh i sungtawngah kipumkhatna leh pankhopna   taktak a om theihna dingin Kawlgam Vaigama ten i vekpi in Lai Siangtho leh La bu nam khat i zatkhop ding hi a, laimal nam khat i zat khop pelmawh hi.  Tua ahih manin Zomite kigawmkhawm theihna dingin biakna makaite tungah tampi kinga hi.  Mizo sungah hih zaha kipumkhatna a om theihna pen Laimal nam khat- Lai Siangtho leh La bu a zatkhop man uh hi ngeel ding hi. I kigawm i pankhop kei leh a malmal in kuamah i khawsuak zo kei dinga, i kiima namdangte husa nawk zo loin kilal veve ding hi.

 

------------