LALDENGA LEH PNC MAKAITE HOLIMNA

- D.Valte

 

 

PNC Political Delegation Team, D.Valte Vice Prez, Thuamson Asst. Gen. Secy leh V.K. Tonsing, member CEC te September 22, 1986 in sawl.  September 23 in Circuit House Aizawlah Laldeng leh zi Biakdiki tawh kihona nei.

 

Singpi dawnna leh limlakna zawh a hihin holimna a kipan hi.

 

PNC: Pu Deng, Mizoram in State ngah ding ahih taak ziakin leh North Eastern-a om U.T. tengteng State piak ahih ziakin kou Ma­nipur  State-a omte tawh tu'n Le­vel Talk nei thei ta hiin ka kithei ua, ka hon kipahpih mahmah uhi. Nang muhdanin Mizoram Accord tawh kisai in Mizoram mipite ‘Re­action' bang a hia?  Mizo mipi tengteng lungkim vek uh hia?

 

LDA: Mizoram Accord tuh Mizoram mi­pite tengteng in a kipahpih vek ua, huan State tuamtuamte ah leng Mizote omna peuhah kipahna lianpi a tun hi.  Mipite kipahna ziak ahihleh buaina veng ta chih leh Mizoram in State a ngah ziak ahi.

 

PNC: Politician minthang khat na hih ziakin leh MNF President leh CM khat na  hihna tawh hiai thu ka hong dong nuam uhi. Ko PNC ten ka Constitution uh leh Policy ah Chin Re-Unification ka koih ua, nang ngaihdanin bangcileh Re-Unification om thei ding a hia? Huan, ko Re-unification policy hi no Greater Mizoram policy sangin lianzaw hilo hiam ?

 

LDA: A dik ahi. Re-Unification ding mah ahi.  Re-Unification a om theihna ding lam thum omin ka thei.  Khatnaah India pang beeline, Indiate thahatna zangin Burma gam i keek thei ding uh hi.  Nihnaah Burma kumpi thahatna zangin Burma kumpi nuaiah om leng Re-Unification lampi khat ahi.  Huan, eite thahatna (Unity) ziak liauliau-in i sual khiak ding uh ahi.  Amasa penin India omte kithutuak phot leng a hoih ding.  Bang teng hileh Re-Unification taktak a om theihna dinginzaw thagum (force) loin a lawhcing ngei kei ding hi.  I nam leh gam hutna-in a phatmawhleh UNO tan uh i gen ding uh ahi.

 

PNC: Tu'n Mizo­ram U T sung mahah State a hon pe zel ua, bang ziak a hia?  Greater Mizoram lawhsam ta hia?

 

LDA: Indiate tawh kilemna dingin thukhun genkhawmna neih laiin thumvei tak Greater Mizoram tungtang kigenlang a, State tuamtuama omte in Mizo ka hih uh a cih theihloh ziakun lawhcinglo phot mah hi.  Mizoram Accord-ah India ten Greater Mizo­ram ka hon chiam thei kei uh a ci uh hi.  Himahleh demand tuamtuamte a lawhcin dingin bel a hi theilopi ding leng phut teitei a kul hi.

 

PNC: Mizo chih in nam teng kigawmna ding a tun diam? Pau tuam zangte tuh Mizo diktak hilo-a ngaihdan leh tuambawlna aom sek ziakin Mizo/Lusei leh namdangte kikalah bang ngaihdan na nei a?

 

LDA: A hi ngut a, tun Mizo cihin Khawvel theihin i om ta ua, a tuamtuamin kigen ciat leng bel kei mahmah leng Pawite ka hi a, ka pi leh pute bang Pawi pau lo paudang thei hetlo ahi uhi. Ka pa panin Mizo (Duhlian tawng) ka zang pan uhi. Mizopau tung­tang ahihleh Assembly-ah ‘by Legislation' in khek a kul ding hi. Himahleh, micih in Mizo ka hi cih a pom vek ta ua, MIZO AH A KIP MAHMAH TA UH HI. Tu'n, mi kua peuh, nupi, papi leh naupang kholaka om maimaite leng dong leucin Mizo ka hi, ka pau leng Mizopau mah ahi, chi'n a hon dawng ding uhi.

 

PNC: Ahihleh thu tuampi khat ka hon dong ding uh: Gambuai lai in ko Paitete MNF-te khutah bangzah hiam tak si ka om ua, tuate ziak mahmah in Mizo leh Paitete kikalah kitheihsiam lohna ‘Sentiment’ a se mahmah a, huai ziak in, hiai thuah Party Level-in kiho ding hia? Nam Level-in?  Bang ngaihdan na nei a?

 

LDA: A hi khop mai. Ka gen sek tham ua, poi ka sa mahmah uhi. Bangteng hileh, huai hunlai zaw unau melhaih hun ahi a, gam buailai leh gal om huan ahi. Micih  in panna lam i nei chiat ua, mi khenkhat ten galkapte a huh ua, MNF huh leng a om ua, kumpilama pang leng tam­pi a om uhi. Huan, Party level dana i lak chiangin Mizo Union-te bang mi 200 val tak a si uhi. Kei sung­khatte mahmah leng tampi a si ua, ka thuakna mahmah hi. Ka gensa mah bangin unau melhaih hun ahi a, tu'n Mizoram buaina ziaka site khempeuh Gam leh Nam adinga Si chi'n Martar Day in sunna neih ahi.

 

PNC: Mizoram buaina ziaka si, inn leh ­lou taan Manipur-ah tampi tak galtai a om ua, Mizoram Accord dungzuiin Rehabilitation piak ding tungtangah bang ngaihdan na nei a? (Manipur-a om mi 200 vel min list CM khut mahmahah piak ahi.)

 

LDA:  Kumpi masa Cong (I) ten    bang­zah hiam a pia ua, tu'n et thak a kisawm hi. Himahleh, election zawh khit chiangin ngaihsut ahi pan ding.  Hiai na laite uh leng a hi thei tanin ka na en ding uhi.  Tun kihawm hileh election propaganda a suah ding kideihlo ahi.  Central ten Rehabilitation sum a hon pe ding ua, a kihawm ding hi.

 

PNC: Chin Re-unification tawh kisaiin Manipur leh Mizorama om par­ty leh nam tuamtuamte tawh ki­hona lianzaw Mizoramah nei le'ng hoih dingin na gingta hia?

 

LDA: A hoih mahmah ding. PNC ten ma hong kai un la, Manipur-a om nam tuamtuamte tawh hong zin un; ka hon na mikhual ding ua, State Guest-in ka hon koih ding ua, neek leh taak, giahna leh a phamawh tengteng ka sik vek ding uh cih ka hon ciam hi.

 

PNC: MIZORAM     ACCORD a kigelh POINT poimawh deuhdeuhte bang­bang ahia, Mizote ading a pha­tuam diak dinga na gintakte…?

 

LDA: MIZORAM ACCORD tuh Mizo mipite phatuamna ding ngen ahi. India Constitution-ah bang teng gelh khit himahleh, State khatah a tawmpenin MLA 60 om ding himahleh, Mizoramah MLA 40 om ding uhi. Huan, Mizote Dan, Sakhuana (Khristian saptuam), Mizote Culture, Custom leh Literature etc.-te Mizoram kumpi thukimna lo tawh khek hiam, ahih keileh hih lamdan theih hilo ding hi.  Mizorama piang Natural Resources himhim gamdangah khakkhiat leh zat thang theih hilo ding hi.  Hiaite India Constitution-ah a tuam mawngmawngin gelh lut ahi.  Huan, Mizoram in Revenue a ngah zawh ban teng Budget a ki-pass zahzah, India ten a kiciamna bangun a hong piaktoh nilouh ding uh ahi.  Mizoram buaina ziaka taang MNF-te tengtent ngaihdam vek ahi ta ua, huai ziakin suangkulha omte tengteng leng khah vek ahi ding uhi.

 

(NB: Dak kal khat val vingveng kihona a kineih khitin Pu Laldenga in Cabinet Meeting hun, dak kimkhata zekai lawh hial ziakin ka kikhen ta uhi.  Pu laldenga in PNC makaite tawh kihona a comment kiza kikdanin “PNC makaite bel a picing khekkhok ngei mai uh” a ci hi).

 

 

Source: 25th SIAMSIN PAWLPI ANNUAL MAGAZINE 1987

 

 

---------------------