MIZORAMA AUTONOMOUS DISTRICT COUNCIL-TE

DR. JANGKHONGAM DOUNGEL

GOVT. LAWNGTLAI COLLEGE

 

 

1. District Council tobul :

India danpui (constitution) a District Council lo chhuah dan hi chhui tham tak leh chhinchhiah tlak tak a ni a. India hmar chhak (chutih hun laia Assam ti a hriat lar) a tlangmite humhalh theihna turin, tlangmite awmna chin hi Excluded Area ti a hriat a lo ni a. Excluded Area awmzia chu sorkar inrelbawldan kalphung pangngai atanga tel tir loh (exclude) tihna a ni. Excluded Area-a tlangmite humhalh an nih theihna turin, tlangmi ni lo te chu sorkar remtihna leh phalna tel lova excluded area a an luh khap a ni a, tlangmite humhalhna tura hemi khapna dan hman kha Inner Line Permit (ILP) ti a hriat a ni a. Kumpinu sorkarin India a chhuahsan dawn khan, India hmar chhaka tlangmite hmakhua tur a ngaituah avang leh, India danpui ruahman dan enpui turin Sir Stafford Crisp-a kaihhruainain Cabinet Minister rual India-ah a rawn tir a. Chutichuan, Cabinet Mission chuan March 16, 1946 khan thuchhuah siamin, India Constituent Assembly in danpui (constitution) a siamnaah hian, tlangmite hamthatna turte siamsak hram turin a chah a ni. Cabinet Mission ngenna kha ngai pawimawhin, Constituent Assembly pawhin Advisory Committee on Fundamental Rights, Minorities and Tribal and Excluded Area a din ve a, Ballabhai Patel kha hemi Committee-ah hian Chairman atan ruat a ni. Tin, India hmarchhaka Excluded Area-a tlangmite chanvo tur bik ngaituah turin North East Frontier (Assam) Tribal and Excluded Area Committee din a ni a, Gopinath Bordoloi chu Chairman atan ruat a ni a, chuvangin, Bordoloi Committee ti a hriat a ni. Bordoloi Committee hian tlangram engemaw zat tlawhin, democracy kalphung nen inmila tlangmite inrelbawldan tur an duang a. Tichuan, inkaihhruaina - rorelna khawl atan District Council leh Regional Council din ni rawh se, tiin rawtna an siam a, chu an rawtna chu Constituent Assembly-in India danpuia - Schedule (ruat/tihtur ziah chhuahna) VI (Parukna) ah dahin, Sixth Schedule ti a hriat lar a lo ni ta a ni.

 

India danpui hman tan a lo ni a, Sixth Schedule kalpui tan a nih khan, District Council 6 leh Regional Council 1 an ding ve a. District Council parukte chu

 

1. United Khasi - Jantia Hills District Council.

2. Garo Hills District Council.

3. Lushai Hills District Council.

4. Naga Hills District Council.

5. North Cachar Hills District Council leh

6. Mikir Hills District Council te an ni a.

 

Regional Council erawh Pawi-Lakher Regional Council (PLRC) chauh a ni.

 

Tunah chuan India hmar chhakah hian Sixth Schedule hnuaiah Territorial Council- pakhat (1), Autonomous Council pahnih (2) leh District Council pasarih (7) an ding mek a, chung chu - Assam-ah pathum (3), Meghalaya-ah pakhat (1), Tripura-ah pakhat (1) leh Mizoramah pathum (3) an ni.

 

Lushai Hills kha Mizoram Union Territory a hlankai a nih rualin, Mizo District Council (Lushai Hills Autonomous District Council ti a hriat kha) thiah niin, Pawi-Lakher Regional Council (PLRC) chu April 2, 1972 khan Regional Council pathum - Pawi Regional Council (PRC), Lakher Regional Council (LRC) leh Chakma Regional Council (CRC) a then a ni a. Regional Council pathum te chu April 29, 1972 khan District Council-a hlankai an ni nghal a. District Council-a hlankai an nih rualin, an hming te pawh - Pawi Autonomous District Council, Lakher Autonomous District Council leh Chakma Autonomous District Council tih an ni a. Amaherawhchu, India Parliament-in kum 1988 a India danpuia Sixth Schedule bik a lo siam danglam khan, Pawi kha Lai ti a thlakin, Lakher pawh kha Mara ti a thlak a lo ni ta a. Chuvangin, District Council pathum te hming pawh kha - Lai Autonomous District Council (LADC), Mara Autonomous District Council (MADC) leh Chakma Autonomous District Council (CADC) ti a hriat an lo ni ta a ni.

 

2. District Council Administration lo indin tan dan leh an hnathawh dan :

Sixth Schedule Paragraph 2, sub-paragraph 6-na a tarlan angin, District Council inkaihhruaina dan hmasa ber kha, kum 1974 khan Administrator hmingin Mizoram Sorkar in a lo siamsak tawh a. Chumi hnuah - an mamawh leh a tul angin, Sixth Schedule Paragraphs 3, 4, 6, 7, 8, 9 leh 10-na ten ‘thuneihna an pek angin, District Council pathum ten an inkaihhruaina dan chu an insiam zel ta a ni. District Council a danglamna em em chu, sorkar peng (organ) pathum te - legislature, Executive leh Judiciary te a neih vang hi a ni. Tin, District Council rorelna hawlah hian a luber (Head) chu State Governor niin, sorkar a nihna anga hnathawktu ber chu Executive Committee a ni a, Executive committee a hruaitu ber (Leader) chu Chief Executive Member (CEM) niin, ani hian rorelna a kalpuinaah a thawhpui tur Executive Member (EM) a ruat ve leh thin a ni. CEM hi State Sorkara Chief Minister dinhmun ang a ni a, Executive Committee hi State a Cabinet nen tehkhin theih a ni a, Executive Member (EM) te hi Cabinet Minister te dinhmunah an ding a ni. Dan siamtu khawl (Legislature)ah pawh session kaihruai turin Chairman leh Deputy Chairman an awm a, anni hi State Assembly-a Speaker leh Deputy Speaker dinhmunah an ding a ni. Chubakah, judiciary (court) inkaihhruaina-ah, District Council Court a awm a. District Council Court-ah hian Court President leh member an awm a. District Council Court hi High Court nen tehkhin theih a ni ang a, Court President & Recorder hi High Court a Chief Justice nen an dinhmun a inang a, Court Member ho hi High Court a Judge ho dinhmunah an ding leh a ni. Chuvangin, District Council hian sorkar peng pathum neiin, sorkar anga ding tur hian lndia danpui a Sixth Schedule­-ah hian ziah luh a lo ni tih hi hriat hmasak ber tur a ni ang!

 

Mizorama Autonomous District Council pathumte chu undivided Chhimtuipui District huam chhunga awm vek an ni a. Amaherawhchu, kum 1998 a Chhimtuipui District - Lawngtlai District leh Saiha District ti a district pahniha then a lo ni tak hnuah, Lai Autonomous District Council (LADC) leh Chakma Autonomous District Council (CADC)te chu Lawngtlai District huam chhungah an awm ta a, Saiha District huam chhungah erawh Mara Autonomous District Council (MADC) chauh a awm tawh a ni. Mizorama Autonomous District Council pathumte administration lo intan dan leh an hnathawh dan tlangpuite chu a hnuaia mi ang hian a tawi zawngin i han thailang chhinteh ang u.

 

2.1. Administration kalpui dan:

Chakma Autonomous District Council (CADC) hi District Council pathum zingah ate ber a ni a, a ram luah chin chu 686.35 sq km a ni. CADC Headquarters hi Kamalanagar (Chawngte ‘C’) a ni a, CADC ram luah chinah hian mihring 37,630 an awm a, Village Council 69 an awm bawk a ni. Sixth Schedule a a inziah angin, CADC administration pawh sorkar peng pathum - Legislative, Executive leh Judiciary neiin kalpui a ni a. CADC-ah hian department 23 a awm a, kum 2001 thleng khan thawktu (employees) 1003 an nei tawh a ni.

 

Mara Autonomous District Council (MADC) hi 1399.90 sq km a zau a ni a, Headquarters hi Saiha niin, Sub-headquarters erawh Tuipang a ni. MADC ram luah chinah hian mihring 37,500 an awm a, Village Council 62 an enkawl bawk a ni. India danpuia a inziah angin, MADC administration pawh hi Legislative, Executive leh Judiciary-a then niin, Department 23 an enkawl a, kum 2001 thleng khan thawktu 1246 an nei tawh a ni.

 

Lai Autonomous District Council (LADC) hi District Council pathum zinga a lian ber leh ram luah chin pawh zau ber a ni a. LADC area­in a huam chin hi 1870.75 sq km a zau niin, Headquarters hi Lawngtlai a ni a, Sub­headquarters Bualpui ‘Ng’ niin, Divisional Headquarters erawh Diltlang, Sangau, Vathuampui, Chawngte ‘P’ leh Lungtian a ni. Kum 2005 a statistical report a a lan dan chuan LADC ram luah chinah hian mihring 60,149 an awm a, Village Council 84 leh Sub-Village 2 an awm bawk a ni. India danpuia Sixth Schedule-a a lo inziah angin, LADC inkaihhruaina pawh hi - Legislative, Executive leh Judiciary anga kalpui niin, Department 25 leh Minor Department 3 vel an enkawl a. LADC-ah hian thawktu 1500 chuang an awm tawh a ni.

 

2.2. Legislature kalpui dan :

District Council pathumah hian Legislature (Rorelna khawl emaw, dan siamtu khawl) a ding vek a. Chuvangin, mipui thlanchhuah dan siamtu / roreltu (MDC)te rorelna hmun atan Session Hall a awm a, session hi thla li danah vawikhat tal an nei ve thin a ni. Session kaihruaitu tur atan Chairman leh Deputy Chairman an awm a, anni hi Lok Sabha leh State Assembly (Vidhyan Sabha) a Speaker leh Deputy Speakerte dinhmun anga ding an ni. Legislature kalphung mumal taka a kal theihna turin, Legislative Department Staff an awm ve nual a. Legislative Department a a enkawltu, bureaucrat/officer lian ber chu Legislative Secretary a ni a. Legislative Secretary hi State Legislative Assembly-a Secretary leh Lok Sabha leh Rajya Sabha-a Secretary General nen an inthuhmun a ni. Legislative Secretary hnuaiah hian Under Secretary a awm a, District Council thenkhatah phei chuan Deputy Secretary pawh an nei nghe nghe a ni. Legislative department hian inthlan (Election ) zawhaterm thar lo intan a piang hian Chairman leh Deputy Chairman thlanna a buatsaih a. Tin, Chairman rawn chungin Session hriattirna pawh a chhuah ve thin a ni. Chu bakah, Session-a zawhna zawt duhte pawh, session neih hma, ni 15 hma a thehlut turin memberte a hriattir ve thin a ni. Tichuan, zawhna (Question) lo lutte kha District Council thuneihna chinin a huam nge huam lo tih hi Chairman-in a thlifim phawt thin a ni. Mahse, dan siamna hna tak tak hi chu MDC ho rorelna District Council Session chauh hian a ti thei a ni. Tunah hian CADC in MDC 17, MADC in MDC 26 leh LADC in MDC 27 an nei a. Amaherawhchu District Council tina member an neihah hian 4 theuh hi ruat Seat (Nominated Seat) an ni.

 

Mizoram Autonomous District Council (Constitution & Conduct of Business of the District Council) Rules, 1974-a Rule No. 73-­a a landan leh India Danpui Sixth Schedule Paragraph 3-na a a lan danin District Council hian dan siam theihna thuneihna a nei a; chu thuneihna hmang chuan CADC in dan (Acts.) 14 leh Resolution 41, MADC in dan (Acts) 28 leh Resolution 29, LADC in dan (Acts) 30 leh Resolution 167 an passed tawh a ni. District Council danglam lehna em em chu Sixth Schedule Paragraph 3-nain dan siam theihna thuneihna (Law Making Power) a pek leh Paragraph 4-na atanga 10-na a thuneihna dang inziak lang hi a ni. Amaherawhchu, District Councilte hian Dan siam theihna thuneihna an neihte hi an la hmang tangkai tawk lo deuh niin a lang. Chu bakah, District Councilten Dan mumal tak an lo neih loh avanga State Sorkar lo inrawlhnate pawh hi sawi tur a awm thin a ni. Tunah hi chuan District Council pathumten inkaihhruaina Dan an insiamte chu State Sorkarin rem tih puiin hemi Dan hian Mizoiam Autonomous District Council (Constitution & Conduct of Business of the District Council) Rules, 1974 a thlak ta a, chu chu an inkaihhruaina atan hman a ni ta deuh ber a ni. District Council-in Dan mumal tak a lo insiam ve loh avanga Revenue (Pawisa) an hloh pawh hi a thahnem fe tawh a ni. MADC erawh chuan Motor Vehicle Act Dan siamin, hemi dan hmang hian MADC huam chhunga Motor lut zawng zawng tax a la a, sumhnar a nei tha hle tawh a ni. CADC leh LADC chuan Motor Vehicle Act hi an la siam thei lo a ni. Chuvangin tangkai lehzual a an thuneihna an hman theihna turin District Council pathumte hian dan siam lamah tan an lak a ngai khawp mai.

 

2.3. Executive inkaihhrua.i dan :

District Council-a Executive (Sorkar a nihna anga hma latu tak) hna hi Executive Committee-in a thawk a. Executive Committee hi District Council atan Cabinet a ni a, Chief Executive Member (C.E.M) hi a hotu ber niin Executive Member (E.M) engemaw zatin an thawhpui a. Amaherawhchu, Administration lam erawh Executive Secretary-in a kaihruai a, a ni hi State Sorkar-a Chief Secretary nen a inang deuh a ni. C.E.M hian E.Mte hnenah chanvo Department an enkawl tur a sem a, a semchhuah loh zawng Department chu aman a enkawl a ni. Executive Committee hian hma lak tur engkim hi a duang a, chu a hmalaknate chu Executive Secretary leh Department tina Officerten an bawhzui a ni.

 

India Danpui Sixth Schedule-a Para 6 (2-na in a phal angin) Governor hriatpuina leh remtuipuina in District Council-ah hian Department engemaw zat din niin hma a la mek a ni. Tunah hian CADC leh MADC hnuaiah Department 21 ve ve Executive hnuaiah an awm a, LADC-ah erawh Department 23 an nei ve thung a ni. Legislative leh Judiciary-te hi a hranin an inenkawl a, Executive Administration hnuaiah an awm lo a ni. Tuna District Council-a Department ding tawhte chu a hnuaia mi ang hian a tihlan theih ang.

 

1) Legislative

2) Judicial

3) General Administration Dept (GAD)

4) Finance & Account Department

5) Planning & Development Department

6) Public Works Department ( PWD)

7) Transport Department                                    

8) Public Health Engineering Department (PHED)

9) Agriculture & Horticulture Department

10) Sericulture Department

11) Rural Development Department

12) Industry Department

13) Animal Husbandry & Veterinary Dept

14) Education Department

15) Social Welfare Department

16) Information & Publicity Department          

17) Co-Operation Department

18) Environment & Forest Department

19) Soil & Water Conservation Department

20) Sports & Youth Services Department

21) Land Revenue Department

22) Art & Culture Department

23) Local Administration Department ( LAD)

24) Fishery Department

25) Water Transport Department

 

GAD hi District Council Staff te Service Record leh Posting chungchang enkawltu ber a ni a. GAD hi Executive Secretary enkawlna hnuaia awm niin Deputy Secretary leh Under Secretary-te pawh an awm bawk a ni. India Danpuia Sixth Schedule Para 6 (1-na a a inziak angin) kum 1975 atang khan District Council-in Primary School a enkawl tan a, chumi zawhah kum 1994 atang khan Middle School pawh District Council kutah hlan a ni. District Council-ah hian Development Department-te LAD, Rural Development, PHED, PWD, Agriculture, Industry, Veterinary, Fishery, leh Sericulture te hian an thawk hlawk em em a. Education leh Sports Department te pawh hian mi hmantlak leh mi puitling chherchhuahna atan tan an la nasa hle bawk a ni. Tin, Environment & Forest Department leh Land Revenue Department te hian Revenue (Chhiah) an lak khawm atang te hian Council tan sumhnar tha tak an siam bawk. Art & Culture Department hian District Council din a nihna tak hi thai langin hnam zia/zia rang leh hnam kalphung te humhalhin tan a la bawk a ni. District Council­-te inenkawlna Fund erawh hi chu a tlem deuh tlat a, tin, an hnathawh dan te duhthusam ang chiah a lo nih loh deuh pawhin an phak ang tawkin District Council pathumte hi chuan hna an thawk a ni tih hi chu hriat a tha.

 

2.4. Judiciary kalpui dan :

India danpuia Sixth Schedule Para 4 (4)­naa inziak angin District Council tinah District Council Court din a ni a. Tin, Sixth Schedule Para 4 (1)-na a inziak angin Village Council Court pawh din niin chu bakah mumal deuha Court kalphung a kal theihna turin Intermediate District Council Court pawh din a ni. District Council pathum te hian Pawl-Lakher Autonomous Region (Administration of Justice) Rules 1954-a anmahni District Council theuhah kum engemaw chhung an la hmang chhunzawm a ni. LADC hian kum 1974 khan Court inkaihhruaina dah thar a insiam a, MADC-in kum 1981 khan an insiam ve leh a, CADC pawhin kum 1997 khan Court inenkawlna dan chu a insiam ve ta ani. Tunah hian District Council-ah Court pathum a lal dan indawt zela kalpui a ni.

 

1) District Council Court

2) Intermediate District Council Court

3) Village Council Court

 

District Council Court hian ‘tlangmi’ (Scheduled Tribe) ho chungchang chu a ngaihtuah thei a. Thubuai nei zingah tlangmi ni lo a tel ve hlauh chuan District Council Court ­a ngaihtuah theih a ni lo. LADC-a District Council Court chu Lawngtlaiah a awm a, intermediate District Council Court erawh Lawngtlai Ieh Bualpui ‘NG’ ah a awm ve ve a, Village Council Court chu khaw 84-ah an awm a ni. MADC hian District Council Court Saihaah a nei a, Intermediate Council Court erawh Tuipangah a awm a, Village Council Court chu khaw 62-ah a awm a ni. Chutiang bawkin CADC pawhin District Council Court leh Intermediate Council Court Karnalanagar-ah nei ve ve in, Village Council Court erawh khaw 62-ah a awm a ni.

 

Village Council Court hi thubuai ngaihtuahna Court hniam ber niin Member 3 leh ll inkar a nei thei a, Village Council Court rorelna hi President-in kaihruaiin thubuai ngaihtuah chungchangah pawisa Rs. 60 thleng a chawi tir thei a ni. Village Council Court thubuai ngaihtuah chungchanga lungawi lo an awm chuan Court sang zawk - Intermediate District Council Court-ah lungawi lohna a thawn (Appeal) thei a. Amaherawhchu, Village Council Court-in thutlukna a siam ni atanga ni 60 chhungah a thehlut hman ngei ngei tur a ni. Tin, Intermediate Council Court thubuai ngaihtuah chungchanga lungawi lo an awm leh chuan, thutlukna siam ni atanga ni 60 chhungin District Council Court-ah an thlen tur a ni. District Council Court thubuai chungchanga lungawi lo an lo awm leh chuan a thlen (Appeal) theihna Court chu High Court a ni tawh mai a. Amaherawhchu, District Council Court-in thutlukna a siam atanga ni 90 chhungin a lungawilohna a thehlut hman tur a ni. Intermediate District Council Court-ah hian Court rorelna hi Judicial Officer-in a kaihruai a, District Council Court-ah erawh Court President & Recorder a ni. Judicial Officer leh Court President & Recorder te hi State Sorkar­a First Class Magistrate te nen inthuhmun an ni. Chuvangin, First Class Megistrate-in Power a neih chin leh thutlukna a siam theih chinah an ni pawhin an siam thei ve a ni.

 

3. District Council te harsatna :

Sorkar rorelna khawl hrang hrangte hi sawisel bo an awm lova, chutiang bawk chuan District Council pawh hian rorelna khawl a nih ang takin sawiselna tur hi a nei ngei ang. Amaherawhchu, sawiselna tur a tam avangin District Council hian a thawk hlawk lo tihna chu a ni hauh lo. District Council kalphunga harsatna nasa tak chu, engkima Politics inrawlh thuk lutuk hi a ni. Politics a inrawlh lutuk avangin recruitment, Posting, Transfer leh Promotion-ah te hian sawi a awm deuh thin. Tin, thawktute training a pe tam thei lo hi a harsatna pakhat chu a ni leh a. Chu bakah Department hminga Notification leh Advertisement te Department Officer ten chhuah lova Executive Member te hminga chhuah a ni leh thin te pawh hi District Council kalphung a mumal loh deuhna chu a ni. Chuvangin, State Sorkar kalphung ang deuhin District Council-ah pawh hian Notification leh Advertisement te pawh hi Department Officer te hminga chhuah ni se kalphung mumal zawk a hrin a rinawm.

 

District Council harsat lehna chu Politic ngelnghet lo lutuk hi a ni. Vawiin thleng hian LADC-ah Election Vawi-8 neih a ni tawh a, MADC-ah Vawi 8 bawk, CADC-ah pawh vawi­ 8 bawk inthlanna neih a ni tawh a ni. Sorkar inthlakna hi LADC-ah vawi 18, MADC-ah vawi 16, CADC-ah vawi 11 a lo awm tawh a. Tin, Sokar inthlak miah lova Party pakhat in Term khat (Kum nga chhung) ro a relna hi MADC-­ah vawi 4, CADC-ah vawi 3 leh LADC-ah vawi 1 chiah a la awm a ni. Politics ngelngheh lohna chhan takah hian District Council leh State Sorkar te hian sawi tur an nei ve ve a. State Sorkarin District Council thawktute rinawm loh vang a ni a ti a, District Council lam erawh chuan State Sorkarin an Party mi ni lo, an thawhpui that tawk loh vanga Party inthlak reng (Defection) leh Sorkar inthlak reng thin hi tam a ni an ti ve thung. Tin, State Sorkar in Fund a pek tur awm a pek ve thin loh vangin District Council hian harsatna an tuar reng thin a ni tih hi District Council hotute sawi tam ber chu a ni. Chuvangin, District Council pathum te hian dinhmun sang zawk an beisei tawh a ni.

 

4. Tlangkawmna :

Mizorama District Council pathumte hnathawh dan tlangpui tarlan tawh atang khan District Council te hnathawh dan chu a hriatfiah theih tawh awm e. Sawiselna tur leh duh tawk lohna lai te lo awm teuh pawh nise, a thawh hlawkna lam zawk ngaihtuah zui atan tha tak a ni. Entirnan; Undivided Chhimtuipui District­-a District Council pathumte hi lo ding lo ta se District Council hmalakna a tun china an thawhchhuah hi a thawktu tur an awm lo mai thei a ni. Chuvangin District Council fel lohna lai leh tlin lohna te pawng sawisel ringawt aiin District Council-in thuneihna tha taka a hman tangkai a, kalphung mumal zawka a kal theihna tura hmalak hi a tul a hi. District Council thiah lam ai mahin an nihna leh thuneihna a nihna ang taka hmang tangkai turin State Sorkar hian hma la zawk ta se, chu chuan inpumkhatna leh inunauna rilru pawh a piantir zawk dawn a ni. Chuvangin, District Council pawng huphurh leh rinhlelhna hmela en lutuk hian inhuatna leh  inhmuh thiam lohna a siamchhuak thei a ni tih ngaihtuah reng chungin District Council hi puitling tak leh thui tak ngaihtuah chungin a nihna leh thuneihna te hi humhalh sak zawk tur a ni. A tawp berah chuan State Sorkar hian District Council hi duat tak leh puitling taka enkawlin District Council pawh hian inlakhranna leh a vung zawnga thil kalpui lova an hnam zia leh ziarang te hi puitling takin humhalh ta se, tichuan State hmasawnna, inpumkhatna leh inunauna a thlen ngei ang.

 

-------------