..

 

..
 

..

 

Mizorama Zomi Kipawlnate
- J. Thang Lian Pau | 2003

 



Mizoram sungah Zomi/Paite minamte a keem a khoi dingin a hunhun in  kipawlna tuamtuam kiphut to zel hi.  Mizorama Zomi/Paite kipawlna kiphut masa pen Paite Federation (1950) leh a nihna Paite National Council(1962) te tangthu kician kimu kha nai lo hi.  Mizoram buai (1966) ma-in Siamsin Pawlpi kiphut khin ngei a, Mizoram buaina hangin bei kik hi. 1980 panin Mizoram Paite Organisation kipawlna tawh i minam sungah kisatsuahna kipan thak in, tua pan Mizoram bup huap Zomi/Paite kipawlnate kiphuh hun, a makai masate leh a nasep ciapteh taak diak teng a tomin hih bang ahi hi.

Mizoram Paite Organisation (MPO)
Kum 1980, April 10 (Laizingni) niin Teikhang khua-ah minam makai mi 17 in phut hi.  Makai masa pen dingin a nuaia teng kiteel hi.
 

..... President Pu -Thangzakap, Teikhang
V/President -Pu Phungkhai, Kawlbem
Secretary -Pu Dalkhokam, Hiangmun
Asst. Secy. -Pu Hnunlian, Teikhang
Treasurer -Thangzalian, Hnahlan
Fin. Secy. -Thangthui, Mimbung
   

MPO in Paite Tribe recognition malak belin nei hi. June 3, 1980 niin India Prime Minister Pi Indira Gandhi kiangah Paite Tribe recognition ngetna memorandum khia uh hi.  MPO sungah Pu Zalawm, Dr. H. Thansang, Pu L.V. Zahnun, Pu Chalthiang, Pu Vanlalhruaite kizang mahmah uh hi. MPO in 1982 kum dong husa nei hi.

Paite Cultural Society (PCS)
March 6, 1982 (Ninoni) niin Aizawl, Tuikual ‘D’ venga Chhinga & Sons Building-ah Pu K. Tin Kam, Pu Gin Khaw Cin, Pu SB Ngin Khaw Zam (Leisenzote), Pu Ngin Khaw Cin, Pu Sawng Khaw Zam (Sesihte), Pu Zam Khaw Lian, Pu Huat Za Bia (Ngaizawlte), Pu Dam Khan Dong (Ngur), Pu Mangzathang, Pu L. Thangrem, Pu Paukai, Pu T.Daikhum (Mimbungte), Pu H.Laldailo, Tg. G. Thangsawmpau, Pu Khamthang, Pu Chhinga, Pi Thanghrim, Pu Rochan, Pu Chalthiang, Pu Sangkhum, Pu Lianchhing, Pu R.K. Daniel, Pu Taivel, Dr. H. Thansang, Pu Luanngaihthang, Pu Dengvung, Pu SB Piang Sian Dongh, Pu Gin Khaw Kam, Tg. Vungzamuan, Pu H. Thangdawl, Pu Thangzading (Aizawlte) ten phut uh in, hih niin a nuaia bangin ciaptehna bawl hi:

   
..... 1. Pu Chalthiang in kipahthu leh MPO tawh kisai leh hanthotna thute gen masa hi.
 
2. Pu SB Piang Sian Dong in Mizoram Paite Cultural Society phuhkhiat a kul thu genna nei hi.
 
3. Champhai Zoucin Cultural Club leh MPO Joint Conference Jan. 25, 1982-a thu paased-te Pu Dam Khan Dong, Vice Chairman Zoucin Cultural Club in report pia hi.

4. Hih meeting in Mizoram Paite Cultural Society(PCS) phuh ding kithukim hi.  Zoucin Cultural Club tawh etkak in, PCS hi zaw leh cih kithukim hi.

 

5. Paite Cultural Society Draft Constitution ngaihsutna kineiin tu-a zat dingin ki-pass phot hi.
 
6. Aizawlah Hqrs. Om ding a, Joint Hqrs. Champhai leh Teikhangah om dingin kithukim hi.
 
7. Kampau(Language) leh Zumlai (Literature) lamah Tedim khua Paite phualpi leh khawpi ahih manin Tedim pau zat dingin kithukim hi.
 
8. Paite Cultural Society Magazine phuah-khiat leh All India Radio, Aizawl pro-gramme thute pen a kihih theih hunhuna hih dingin kikoih hi.
 
9. Sum muhna dingin Special Contribution kibawl leh cih hi a, hih dingin kikoih hi.
 
10. Dr. H. Thansang in MPO leh Cultural Society tawh kisai hanthotna thu genna nei hi.
 
11. Hqrs. Makai (Office Bearer)-te kiteelna a nuaia bangin om pah hi.
   
  President -Pu SB Piang Sian Dongh
V/President -Pu R.K. Daniel
Secretary -Pu Gin Khaw Kam
Asst.Secy. -Pu Thangzading
Treasurer -Pu Rochan
Fin. Secy. -Pu H. Laldailo
Adviser -Pu Chalthiang


PCS pian ma in, Champhai-ah Zoucin Cultural Club, kiphut khin cih kilang hi.  PCS in ngeina lam sai diak in, 1983kumin Kawlgam panin ngeina Zopuante lasuk in, hawmkhia hi.  Ngeina la leh lamte sin zel in, pawi tuamtuam leh khawmnpi tuamtuamah lak zel hi.  Paite kipawlna dangte tawh kikop in Radio ah TV ah zong la leh lam khumkhawm zel hi.  Ngeina pawi tuamtuamte zong bawl zel hi.  PCS in zong a kiphuh tuung panin Tribe recognition ngah nadingin ahih theih bangin pan la to in, PCS President Pu SB Piang Sian Dongh in May 5, 1986 niin Mizoram Chief Minister tungah Tribe Recognition ngetna tawh kisai lai, laimai 4 a pha khak hi.  1998-2005 kikalah malakna om loin 2006 kumin a kipuah thak kik hi.

Siamsin Pawlpi Piang (SSPP)
1989, May 21 niin Aizawl khawpi sung college tuamtuama Paite siamsinte in phut in, a cilin kipawlna min dingin All Paite Student Union (APSU) leh Siamsin pawlpi (SSPP) kitehkakin SSPP kiteelin SSPP Aizawl Branch suak hi.  SSPP Headquarter, Lamka in October 20, 1990 niin Joint Headquarters-in sang a, 2001 kumin Headquarter dinmunah kikoih hi. Tua panin SSPP Headquarters, Lamka pen SSPP General Headquarters suak hi.  SSPP Headquarters, Aizawl makai masa pente hih bang hi:
 

.....

President - Pu Biakchungnung
V/President - Tg. H. Zakap
Secretary - Tg. L. Vungh Zathang
Asst.Secy. - Tg. T. Lianzading
Fin. Secy. - Tg. H. Khaizasiam
Treasurer - Lia Chawngthanmawi

Members

Tg. C. Rolian
Tg. L. Thangmawi
Pu Hmingthansang
Tg. Ginkhansiam
Pu Thangrouchung
 

Patron

Dr. H. Thansanga
 

Advisers

Pu LV Zahnuna
Pu Ngurdingliana
Pu Z. Zahnuna-te


1993 kumin Dr. H. Kamkhenthang, Tribal Research Officer, Manipur huhna tawh Pu Lal Rozual in a bawl Paite pau Sinna Laibu ki-release hi.  Fresher Social bawl zel in, siamsin naupang laipilte pahtawina pia zel hi.  1993 kumin Paite mi leh sa Mizoramah Gazzeted Officer om zah kaikhawm hi.  Aizawl City Zomi Census leh Telephone Directory bawl zel hi.  Paite nam demand leh Tribe recognition ngetna vai-ah PNC tawh pangkhawm hi.   Mizo Zirlai Pawl-ah Affiliated member hi.   Mizorama Lusei ahi lo namdang sangnaupang kipawlna tawh ‘Mizoram Tribal Students Federation (phuh 2005)’ ah kipawlkhawm hi. Tu dong nungta lai hi. 

Paite Federation (PF) 
July 17, 1990 niin Aizawl, Ramthar Venga Pu G.Thuamliante innah ‘Paite Federation” kiphut in, a nuaia bangin makai panmun len ding kibulh pah hi.
 

...... Chairman - Pu G. Thuamlian
V/Chairman - 1) Pu SB Piang Sian Dongh 2) Pu H. Zathuam
Secretary - 1) Pu H. Khaizasiam 2) A. Siama Hatlang
Asst. Secy. - Pu G. Dampau
Treasurer - Pu L.V. Zahnuna
Fin. Secy - Pu Lalrozuala
S/Advisers - 1) Pu Vungzadeng 2) Pu Khancin, Kolasib


Sialkaltang dung leh a kiima HPC gamnuaimite hanga Paite mipite patauhna-te khamuan nadinga kiphut hi in, MizoramPaite mite dinmun tawh kisai in PNC (Manipur) tawh kivaan tuah hi.  Kum khat sung bek ding hi.

Paite National Council (PNC)
Mizorama Zomite ciapteh den taak cing, North-East India Paite Nam Khawmpi Lian kici liang March 6, 1991 niin Mimbung ah kibawl in, mun tuam gam tuam pana mi thupi lim kikaihkhopna pen hi. Palai tengin Paite National Council (PNC) phut in, vaipua dingin a nuaia teng kiguan pah uh hi.
 

...... President - H. Zathuam
V/President - G. Dampau
General Secy. - K. Vungzamuan
Secretaries - 1) Muana Hangsing, 2) Dalkam 3) Laldothang
Treasurer - Thangzakap


Mizoram Paite namte a keempi pen hi.  Minam demand - Tribe recognition, Autonomous Distric Council leh Development Coucil cihte bawl in, kumpi tungah memorandum tam veipi khia in, ahih zawh zahin nawk toto hi.  1993 kum Mizoram MLA election in PNC min tawh Pu H. Zathuam in tuh in cing hi.  1990 kum MP election in PNC min tawh Pu Pual T.K. Dong in MP tuh in vote 4159 ngah hi.  PNC leh eimi kipawlna dangte hanciamna tawh 2003 kumin Mizorama eimi ten Paite min tawh Tribe Recognition kingah ta hi. 2004 in PNC pen Paite Tribe Council (PTC) ciin a min kikhek hi. Tulai taka President Pu Muana Hangsing hi.  Tu dongin thahat lai hi. 

Zomi Society (Z.S.)
Aizawlah 1994 kum, June 26 niin piang hi.  Z.S. a phutte leh makai panmunlen masa pente hih bang hi.
 

...... Chairman - Sing Khan Tuang Guite
V/Chairman - Benjamin Thang Lam Thawn
Secretary - Kam Khaw Khai
Asst. Secy. - Cing Khawm Lun
Treasurer - Thawng Do Pau
Fin. Secy. - Suan Khen Lian
Asst. Fin. Secy. - Niang Ngaih Don
Editor - J. Thang Lian Pau
Asst. Editor - Ciin Suan Niang
Cultural Secy. - Micheal Nang Lam Pau
S. Advisors - Pual T.K. Dong & Gin Khaw Kam.


Z.S. in nopna leh dahna vai, ngeina leh lai lamah ma la in, Zomi ni thupite leh pawite bawl zel hi.  Tedim kampau leh Paite kampau  kipumkhat nadingin ma la in, PCS tawh kikopin kalsuan hi.  Zolawkta thukizakna hawmkhia hi.  1997 kum dong thahat hi.   Makai panmun len masa pente hih bang hi. 
 
Zomi/Paite Students Federation
August 30, 1994 niin Aizawl Venglai-a Pu Lal Rozualte innah kiphut in, makai panmun len dingin hih bangin kibulh pah hi.
 

...... President - Lalthanzam
V/President - Vanlalveni Hangzo
Gen. Secy. - Lal Rozual
Asst.G/Secy. - D. Thangbiak
Treasurer - Vanchhingpui
Finance Secy. - TS Hauzalian


ZPSF in Paite Tribe recognition mah malak belin nei hi.  1995 kumin Tribe Recognition ngetna memorandum khia in New Delhi-ah palai sawl hi.  AIR, Aizawl Station-ah programme minute 30 sung neih nadingngen hi.   Tangcing-necktie bawl hi.  Mizo sangnaupang kipawlna - Mizo Zirlai pawl-ah kizang in, ZPSF Gen. Secretary Pu Lalhminglian pen 1996 kumin MZP Gen. Secretary in cingsak thei hi.  Paite nam demand leh Tribe recognition ngetna vai-ah PNC tawh pangkhawm hi.  A tunga makaite baanah Ngulzathuam, Hau Lian Thang, Patrict T.S. Piang, Sing Khan Tuang Guite, Joseph Gin Za Liante kizang mahmah uh hi. 1996 kum ciang dong thahat hi.

MIZORAM
PAITE ACTION COMMITTEE
Mizoram Paite Relief Committee
Paite Tlangau thukizaakna


Manipur, Zomi leh Kuki buaina hanga Mizorama galtaite dong a hu dingin 1997 kumin Mizoram Paite Action Committee (MPAC) kiphut hi.  MPAC huzap nuai-ah Mizoram Paite Relief Committee (MPRC) leh Paite Tlangau thukizakna lam a sai hiang nih om sawn hi.  MPRC makaite:
 

......

Chairman - Rev. P.H. Routhuam
V/Chairman - 1) Maj. Khaizading 2) Pu Lalnunthara 3) Upa Vumzalian
Secretary - Pu Kenneth Go Mang
Asst. Secy. - 1) Pu Vunghnun 2) Pu Lalthanzam 3) Pu Vunghzathang
Treasurer - Upa Lalzuilian
Fin. Secy. - T. Kaithang
 

Advisers

Pu H. Haukhum IAS
Pu Clement Lalrem
Pu H. Zathuam
Dr. H. Thansang
Pu Zalawm


MPRC in galtaite huh nading kaihkhop, huhna hawmkhiat seempi pen hi.  Minam in phattuampih mahmah hi.   Mizoram kumpi in Paite refugee-te tunga Inner Line Permit a siikna vai-ah a hih theih zah nangin lungkim loh lahna Aizawl lamdung tengah poster khawng suang hi.  Buai sung teng awh a, tun bei kik ta hi.

Zomi Aw Thukizakna
1998, July 5 niin Aizawl EBC Pastor quarter pan Zomi Aw thukizakna masak pen hawm kipan hi.  Kum khat bang bek nungta in nimit. 17.10.1999 nia suak pen a kihawm tawpna hi.  Zomi Aw Editorial Board in Aizawl Zomi Telephone Directory khatvei bawl in, Zomi Aw hawmna-ah Pu Khamkhokam Guite, SE (P&E) in sum leh pai tawh panpih zo mahmah hi.  Zomi Aw saite mi tuamtuam ahih zel hangin a min pua deuh pen Tg.  Thongthiangin (editor), Tg. L. Thawmte (News Editor) leh Lia Elsie Paite (Cir. Manager) te ahi hi.

Mizoram Paite Union (MPU)
Tu ciangah Mizorama eimi kipawlna kiphut nunung pen Mizoram Paite Union (MPU), June 10, 2004 niin phut in, PAITE INNPI zong ci uh a, Interim Council zong a nuaia teng tawh kibulh uh hi:
 

...... Chairman - Dr. H. Thansanga
V/Chairman - 1) Pu L.V. Zahnuna 2) Pu H. Zathuama
Gen. Secy. - Pu V. Zahnuna
Secretary - 1) Pu N. Rothanga 2) S.B. Dalngova
Treasurer - Pu Clement Lalrema
Fin. Secy. - Pu Gosiama
Adviser - Pu H. Rohluna, MLA


Pu Muana Hangshing MPU pen political party dang tawh kibang lo a, minam (Zomi/Paite) kihuaikhopna ding INNPI hi in, i minam sunga kipawlna om teng, viz. political kipawlnate, Voluntary kipawlnate, Siamsin kipawlnate leh adang teng kikhilkhawmna ding hi a, kipawlna, mimal haksatna, minam vaia haksatnate ah thututna ding, Mizorama eimite tawh kisai thutawp bawl thei ding, ciin ngaihsutna nei in, MPU in Mizoram sung bek huap hi.

Biakna lam
Mizoram ah eipau tawh biakna pawlpi bangzah hiam om mah leh, a picing zaw deuh nih – Evangelical Baptist Convention(EBC) leh Zomi Baptist Church of Mizoram(ZBC) ahi hi. EBC phualpi pen Lamka hi in, Mizorama EBC pawlpi teng Division khatin omin Superintendent-in op hi. ZBC in Mizoram leh Meghalaya-ah Branch 14 nei in, a phualpi Champhai-ah koih in, Executive Secretary in op hi.

ZBC Hqrs. in kha sim thukizakna Laitai hawm in, ZBC Aizawl branch in kal sim thukizakna Zaitha, EBC Aizawl Saptuam in kal sim thukizakna Lengtong tu dongin suaksak den hi.

Thukhupna
Leitungah Mizoram bek mah i pau i min i zat natawm hong ki-etcikna omsun ahih manin Zomite dinmun siatna pen cih ding hi. Tu ciangciang i minam hong nungtasakpi pen i pau tawh kikhopna i neihte hi a, Mizoram ah i minam kepna dinga poimawh pen i pau tawh Pasian biak hi, cih phawk thak suak tek ni.

...

..

 

..
 
 

 

 

 

SPONSORED BY:  WWW.ZOGAMONLINE.COM  &  WWW.ZOMISTORE.COM  &  WWW.ZOLAWKTA.INFO

 

.

A Bawl - J. Thang Lian Pau (2006 pan)

Email: zotop@yahoo.com | zotop@rediffmail.com