Ka Zawlnu ‘Ngaih Ang ah’

- J. Thang Lian Pau | March 10, 2004

 

 

Ka cipih leh ka zawlnu hi dingin cik mahin ka kilamen kha ngei kei hi.  A min ka zak cilna pen Mumbai pana Mizoram hong kileh kik kum 1990 pawl hi in nei ing.  Tua pen Mizoram in zong la lam ah amah a meltheih cil lam hi in, tua lai na-na-na in Mizoram ah mel leh duang, aw leh tat ah kua dem zawh ding hi lo hi.  Mizoram dung leh vai-a minthanna teng leh tangpaalte luntang teng pen a ma-a hi in, kua hazat theih hi lo hi.  

           

A tangthu ka zak kik leuleu ciangin ‘pasal neih sawm’ cih hi mawk hi.  Ka lungsim in “pammaih mah si” ci samsam hi.  Ai’zong cih theih om lo hi.  A pasal ding in Mumbai ah a damloh laiin na lim khoi mahmah ngei hih tuak hi.  A dam kik ciangin “U aw, ka damloh laia nong kep nong khoina panin nang zong natna nei na hihlam ka phawk hi.  Nang zong na dam nading ahih naak leh ‘kei’ leh ‘ka nuntaakna’ teng khempeuh pen nang deih bang hi ta hen; hong theisiam in!” cih pen a lungdam kohna hisak hiau mawk hi!

 

A kiteen ni mopawi pen lei mihing leh vantung nungak Mo kipi hi mai-in ka thei hi.  A kizepna Mopuante  leh  lam  tawna  Otto band’ pahtawina tumgingte pen amah tawh kilawm lua hi.  Tua ni in pen leitunga muh theih khempeuh etlawm khin in, a ging khempeuh pen ngeih khin mai hi.   Leitunga lunggulh pen khat gen ding hi leng tua Monu’ taklam a ‘pen’ kici ciat kha ding hi.  Ai’zong zalmang in zong hong matsak ngei loh sinthu lel lah hi mawk hi.

 

A mopawi nasiatzia leh minthan-zia panin amau nupa pen ki-it diak ding leh nuamsa diak dinga kilawm napi, ta nih a neih zawh uh ciangin itna in kiam hun nei ai’diam hong kikhen dihdih mawk uh hi.   Sian in zong ‘Itna kip khosak’ leh kilawm sam hi ven. Naupangte pen a nu’n Dawrpui veng ah inntuam luahin ompih hi.  A pasal in pen zi nei kik khin zo hi.

 

Ka kimuh cilna uh leh bangci bangin kimeltheih kha, cih pen ka gen theih nawn loh hangin, a min ka zak zawh kum sawmna 2000 kum pawlin pen ka zawlnu hi khin zo hi.   Ta nih nei khin, nungak kik ahih hangin limci pen zo lai veve in, i kiang ah hong om ciangin i lungsim tawng pen na ‘nuam khinkhian’ kha pahpah hi, kici tek hi.  Album thak a release ciangin mi tawmcik a cialna ah hong hel tangtang zel ka cih ciang aman zong zawl takpi mahin hong ngaihsun hi, ciin ken zong ka ngaina lo thei kei hi.

 

Amah tawh kizawl ka hih hangun kua mi kua sa, cih ka kidong ngei kei uh hi.  Ai’zong aman ning kum Nov. kha in ka zawlpa mah Benjamin Guite (McPie drumer) kiang ah Guite beh (Vuite a ci zong om) a hihlam na hilh kha lak hi.  Tua panin amah pen ka zawlnu bek hi mai loin ka cipih taktak na hi gige mawk, cih ka tel hi.   A tunga a photo pen Zolawkta ading ngiata hong piak hi setsat se hi!

 

Ka ngainat mahmah ka zawlnu’n tukum February 26 niin a it mahmah Lal Rinmawia tawh pumkhat suahna mopawi thupi takin bawl uh hi.  A pasal pen Ex-Minister Pu ST Rualyap (Mara) tapa hi in, Aizawl Khatla vengah teeng hi.  A pasal zong amah bangin music ukin Bible Society Lapawl Convener hi. Mizoram pana internet website lawhcing pen pawla kigen www.zoramworld.com zong Rinmawia aa hi in, English section editor pen ‘ka zawlnu’ cih dan khawng na hi se uh hi.  Pasal hong neih kik ding ciangin a tate pen a pate kiangah kha kik phot hi.

 

Ka zawlnu ka cihcih, Rebecca Saimawii in 1990 kumin album masa pen ‘Zai Rimawi’ leh 1998 kumin ‘Ka Thlang Ber Che’ cih release hi.  2000 kumin piangthak in, tua zawh phatna la album thum, ‘Min Hmangaihna Ropui’ (2000), ‘Khawthianghlim Jerusalem’ (2001) leh ‘Ka Nung Reng Ang Kristaah Chuan’ (2003) bawl kik zo hi.  Kristmas la baan ah English leh Hindi pau tawh album zong bawl ngei hi.

 

Makuri pen kum 1968, Nov. 1 niin Shillong ah piang a. PU tan a sin zawh ciangin music lam ah pial in, Zotate lakah a lawhciang pen pawl suak hi. Pahtawina Award tuamtuam a san tawmsan lo hi.  Sian in ngaih ang ah itna kip khosak ta hen…

 

-------------