Z O G A M    U K P I T E

- J. Thang Lian Pau (2010)

 

Zogam (Tedim gam) ukpi minthang, a diakin Sukte ukpite pen 1800 kum pawla a khang Mualbem ukpi Khan Thuam’ suan leh khakte ahi uh hi.  Tua ma teng Ciimnuai hun panin Guite Innpite lian pen in, Kam Hau hun panin Guite Innpite Tedim gamah kiamin Lamka lam gamah kikhin to uh hi. 

 

Khan Thuam in tapa sagih nei hi – Luah Kai, Kam Hau, Pau Kam, Gawh Pau, Za Kai, Za Pau leh Khan Zam.  Za Pau in tapa thum nei hi – Thuam Khaw Thang, Vai Kham leh Do Thawng. Do Thawng in tapa khat Thuam Za Mang nei hi. Gawh Pau in tapa khat Thuam Thawng nei hi.  Thuam Thawng in tapa nga nei hi – Pau Dai, Do Tual, Pau Mang, Cin Mang leh Pau Dal.  Do Tual in tapa li nei hi – Thawng Za Khup, Thawng Cin Thang, Dal Za Kam leh Mang Khaw Nang. Kam Hau in tapa guk nei hi – Za Tual, Lian Thang, Thuam Lian, Thang Khaw Pau, Hau Pum leh Khaw Cin.  Khaw Cin in tapa nei lo hi.  Hau Pum in tapa Hau Cin Khup bek nei hi. Hau Cin Khup in tapa li nei hi – Pum Za Mang, Hau Cin Pau, Kam Cin Thang leh Lian Cin Thang.

 

Kam Hau gam (Tedim/Tonzang) ah Kam Hau in 1820-1868 sung, Khaw Cin in 1868-1890 kum sung, Hau Cin Khup in 1891-1934 kum sung, Pum Za Mang in 1934-1948 kum sung ukpi seem hi.  Khaw Cin in tapa neilo ahih manin a u Hau Pum tapa Hau Cin Khup in ukpi za luah ahi hi.  Mualbeem ah Khan Thuam, Za Pau, Do Thawng, Thuam Za Mang ten ukpi seem hi.  Saizang hausa dingin Khan Thuam in Gawh Pau pia hi.  Thuam Thawng hun ciangin Saizang pan Kaptel khua satin kisuan uh a, Cin Mang tungah Kaptel nusiat in, midang teng Do Tual makaihna tawh Saizangah kileh kik uh hi.  Do Tual zawh ciangin Thawng Za Khup in Saizang ukpi seem hi. 

 

Khaw Cin, Do Thawng leh Thuam Thawngte hunin Mikangte hong khang hi.  Hih teng thum pen Zomite laka Mikangte lim do pen pawl ahi uh hi. Mikangte dona-ah Thuam Thawng leh Pau Dal zong si hi.  Mikang ten Hau Cin Khup pen Zo suante lak pan ukpi thupi pen hihna (Tribal Chief) pia-in leh pahtawina ‘SIR’ za taangin a phattuampih zawk ding Saithau zong pia hi.  Pum Za Mang in Zomite tanga Panglong thukimna-ah suaikai dingin Thawng Za Khup sawl hi. Pum Za Mang, Thuam Za Mang, Thawng Za Khup-te khan lai 1948 kumin ukpi kiphiat hi.

 

---------------------