ZOMITE KIKHEN THEILO

- J.  Thang Lian Pau | Nov. 4, 2007

 

 

Siamsin Pawlpi, Hqrs., Mizoram in tu kha (Nov., 2007) pana Journal (Monthly?) hawm kipan ding chih ka zak ziakin leh article thawh dinga chih ka hihna-ah kipahhuai ka sa mahmah hi.  Mizoramah eimi ten political demand khawng nei mah leng, tua zah maha ka lunggulh dang pen Aizawl khawpi sungah mun le mual neih ding leh thukizakna neih paisuak ahi hi.  Thukizakna pat a hak kei a, a zop suak ding mahmah a haksa hi.  Tua ahih manin tutunga pen i panpih huan ding kua peuh ka hong ngen ut hi.

 

Thupi-ah lut ta leng, Mizoramah eimi ten gammi i hihna-ah i masuanpi pen Sialkaltang ahi hi.  Ahi zongin, bang chi bangin Sialkaltang pen i phual hi thei a hiam chih, Zomi khangthakte genloh i upa lamte in zong suut tam ngei khollo i bang hi.  Tulaia Mizoram kichi suahlam (Sialkaltang) teng i gam ahihdan a tomin i taklang ding hi.

 

Zomite in gam leh minam mumal taka i din kipatna pen Mualbem khua-ah Sukte Khan Thuam in ukpi a sep pan ahi hi.  Aman tapa sagihLuah Kai, Kam Hau, Pau Kam, Gawh Pau, Za Kai, Za Pau leh Khan Zam nei hi.  Zapau in Mualbem innpi ngakin, Kam Hau pen Tedim ukpi dingin kipuak hi.  1820 kum pawl pan 1868 kuma a sih tan Tedim ukpi-in Kam Hau pang hi.  Aman tapa gukZa Tual, Lian Thang, Thuam Lian, Thang Khaw Pau, Hau Pum, Khaw Chin nei a; Khaw Chin in a pa khitin Tedim gam ukpi seem hi. 

 

1890 kuma si, ukpipa Khaw Chin pen Sailo lamah Champhai hausa Vanhnuailiana tapa Lalburha tawh kigual vel a, Vanhnuailiana 1870 kumin si hi; Guite lamah Go Khaw Thang tapa Sum Kam (1893 kuma si) tawh kigual vek bok hi.

 

Khan Thuam tate ukpi ahih uh pan Mualbem leh Tedim pangkhawmin hausa dangte leh khua dangte khat khit khat do-in zo vek zel uh a, khang khat sungin tulaia Tedim leh Tonzang gam (township) teng banah, tulaia Manipur simlam leh tulaia Mizoram sung Tuivawl lui tan bang awp suak uh hi.  Amau laka a kitulut khua bang, a khua sat thak uh bang tawh ukpipa Khaw Chin hunin amah kia beka a uk khua 135 pha a, a sanggamte ahi Mualbemte uk tawh bang gawm leng, tua lai-in i gam zai mahmah hi. 

 

Zotate lakah tulaia Mizoram kichi suahlam (Sialkaltang) a luah masapente eimi kihi hi.  Lalsavunga tapa Vanhnuailiana in Darlawng khua pan kipana suahlam gam zuana Champhai a luahtoh pan, Vanhnuailiana sanggampa Lalphunga ten Sialkaltanga Zomite khinkhia in, a tapa Pawibawia in Selam khua tutin, a zi Lalthangthluaii in Teikhang khua tut hi.  Tua pen Vailen Masa (1871-1872) kichi hun pawl hi.  Ukpipa Khaw Chin in a gam banga a ngaihsut kimlai Sailo hausa ten luah a, a sunga teeng Zomite a nawhdalh lai uh pen lungkim loin Sailo hausa teng Tuivawl lui khang tanah nil suk kik in, Pawibawiate zong Khawruhlian khua-ah taisia uh hi.  Tua ziakin Sialkaltangah Zomite hausa-in pang thei kik hi.  Tua tantan i gen hang, Sailote pen eimi suul suak, i laizomte a hihlam uh zong i theih phamawh veve hi.

 

Tua hi a, British ten hong awp chiangin Mizoram suahlam pen Zomite gam a hihlam thei-in, a uk dingin 1899 kuma Songtal pan Mimbung khua-ah Guite innpipa Kam Za Mang a lut chiangin hoih takin na kithuahpih a, Tuivawl lui pan suahlam teng uk dingin seek sawmin, Aizawlah bang lai a simsak uh hi. 

 

British ten nam thupi taka siam hong sawmna bangin Tuivawl lui saksiah tengah ukgam din manlo a, thau thubuai ziakin Kam Za Mang ten Phaitong khua zuan kik uh mahleh, a vaihawmpih Hauzel Sing Vung leh Guite Ngaithang Sawmpaute khutah Sialkaltang teng neihna British kumpi in pia veve lai hi.  Tua chi-in, Zomite pen Mizoram neitu nampite lakah i kihel gige den ding hi.  Hih bang i hih theihna pen i gen taak bangin, tulaia Chin State kichi leh Manipur kichi-a i mipihte ziak ahi chih, khangthak ten i theih ding poimawh a, tua ziakin ‘Zomite kikhen theilo’ ci i hi.

 

A dik takin Zotate lakah eimite pen nam upapen, ngeina nei hoihpen, hangsanpen, ukpi (or lal or hausa) nei thupipen leh gam nei zaipen i hi hi.  Himahleh British-te gamgi hong khensakdan in ei gam khoihpoi diak a, tua in i ma hong khak nasa mahmahin, a siatpihpen kihi kha hi.  Khangthak ten i pu i pate phuhsa i gam hum utna i nei ding hiam?

 

 

 

Laibu Ekkakte

  1. Dal, Gho Khan: Guite Khang Thu (History of Guite), Kalemyo, 1986
  2. Guite, H. Lianzamang: Hauzel Genealogy, J.P.  Offset Printers, Aizawl, 2006
  3. Lalthangliana, B: India, Burma & Bangladesh-a Mizo Chanchhin (History and Culture of Mizo in India, Burma & Bangladesh), The R.T.M. Press, Aizawl, 2001
  4. Lalthanliana, Dr.: Mizo Chanchhin (Kum 1900 Hma Lam), Gilzom Offset Press, Aizawl, 2000
  5. Neihsial, Dr. Tualchhin: Mangkang Gamkeekte Nuaia Zoumite, The Convention Press, Lamka, 1987
  6. Pau, J.  Thang Lian: History of Zomi (Un-published)
  7. Sukte Beh Committee, Sukte Beh leh Tedim Gam Tangthu, Tedim, 1996

----------