ARTICLE (MIZO)

 

 
..

 

..
 

..

 

INPUMKHATNA ATAN MIZO TAWNG

- H. Zaneisang, Rengkai, Churachandpur

 

 

Inpumkhatna atan Mizo tawng tih thupui hmanga Lian Kunga article, Aizawl Post February 17, 2006 edition-a chhuak chungchangah khan sawi ve duh tam tak ka nei a. A vai chuan sawiseng lo mah ila, ka sawi duh tam tak zinga tlem azawng ka han ziak ve teh ang.
 
Kei hi Hmar (Mizo), Mizorama piang leh seilian ka ni a. Engtiklai mahin Mizo ka ni lo, ka ti ngai lo. Hmar tawng ka hman avanga Duhlian tawng hmang ten Mizo tak tak i ni nange ? i tawng a va pai ve min tih mai vanga ka Mizo nihna hi bo mai thei pawh a nih loh hmel. Chutiang bawkin India ram state hrang hranga cheng, tawng hrang hrang hmangte hi Hindi tawng an hman loh mai vangin Jndia mi an nihna a bo chuang lo bawk. A thu ziak atanga.chiang taka lang chu Mizoram chhunga cheng Hmar/Paite/Pawi etc mahni tawng hmangte hi tihluihna (force) hmanga Mizo tawng (Duhlian) hman luihtir; Association hrang hrang, HYA, HSA, YPA leh a dang dangte hi sawrkar leh YMA/MZP te chakna leh tharum hmanga nuaibo chu ziaktu duhdan a nihzia chiang takin a hriat theih a.
 
Magazines leh Daily paper hrang hranga Lian Kunga articles ziak ka lo chhiar ve thin a. Tuntuma ziaktu pawh hi IAS val Lian Kunga kha ni ngei turah ka ngai a. Chuvangin India danpui hnuaia tawngdialect hrang hrang humhalh leh tihhmasawnte, India mi tu pawh, thliar bik leh duhsak bik nei lova an Fundamental Rights humhalhsak chu a hna (­duty) a nihzia chu a hai em lovang chu maw? Nge, he article ziaktu hi mimawl High School pawh rap pha lo Lian Kunga dang zavk ziak?
 
Mizo hnahthlak hnam hrang hrangte tawng zinga lar ber leh thang chak ber chu Duhlian (tuna Mizo Tawng kan tih tak ber) hi a ni tih chu tumahin kan hnial awm love. Tun atanga kum engemaw zatah phei chuan Zo hnahthlak tawng dangte phei hi chu political safeguard an neih loh avangin an la ral ang a, tuna Mizo tawng kan tih tak ber (Duhlian) hi Zo hnahthlak hnam hrang hrang ten kan la hmang vek ang tih chu rin dan tlangpui a ni. Amaherawhchu, heng Mizo tawng dangte hi by force-a tihbo chi chu an nih hmel loh. India ram hmun hrang hrang hi ka tlawh ve tawh a. Khawi hmunah pawh Hmar tawng hmang an awm chuan Hmar tawngin ka bia a, tumahin Hmar tawngin tawng suh, Hindi/Telegu/Kanada etc tawng hmang rawh min ti ngai lo, Mizoram ah chauh lo chuan.
 
Hemi chungchang hi ka han umzui hlek teh ang. Hmar tawng tih lovah chuan Mizo (Duhlian) tawng hi ka tawng thiam her a ni a, a thluk ka pai deuh tih mai loh chu subject-ah pawh B.A. thlengin ka zir tluanchhuak ve a. Tunhma kum 20 vel kalta atang khan Hmar tawng tiam lova ka tawng hman tam ber chu Meitei tawng ni mahse chaw nghei lohna tawk bak ka hre lo. Thiam lo tak ka ni ringawt. Mahse an tawng ka thiam loh avangin Meitei pakhat mahin min la nuihsawh lo. Mizo (Duhlian) tawng erawh keima tawkah thiam ka intih ve tehlul nen, Mizoram chhungah erawh tawng pai deuh avanga innuihsawhna leh inhmuhsitna vawi duai lo ka tawk tawh. Kei chauh ka nilo, Mizoram chhunga cheng Awze tawng hmang kan tih hote hi chuan kan tawk theuh tawh awm e. Mizorama cheng Duhlian tawng hmangte hian Awze tawng hmang chu Mizo nia kan ngaihloh zawk avang hian, mi tam tak chuan Mizo intih chu harsa an lo ti pawh chu a ni mahna.  Tin, Indian Citizenship neite chu India ram hmun khawilaiah pawh an chengin an khawsa thei a. Rambuai laia Mizo inti duhlote pawh Mizorama an chen khap theihna pawh a nei lo tih chu Lian Kunga hi a hrechiangtu berte zinga mi a nih ka ring. Tuna Mizorama chengte pawh hi Mizo an ni vek lo bawk.
 
Tin, Lian Kunga hian “India ram khawi khawi emawah chuan tam takte chuan Mizo ni duh lovin an inti hrang a, a hrang a hraiin an inkhawm daih thin” tiin a ziak a. Mahni pianpui tawng lo na na na chu, Pathian thu ngaihthlak leh sawi nante a lo har a. Tawngtai lek phei chu har tak a ni. Kei, B.A. thlenga vernacular subject-a zirchhuak mahin har ka tih chuan, a zir ve lote tan phei chuan tui har tak tur a ni. Mizo tawng kan tih tak ber hmangtute pawh hi, India mi an intih loh vang ni lovin, tawng khat hmang an nih vang zawkin India ram khawpui hrang hrangah pawh an inkhawm hrang zawk niin kei chuan ka ngai. Hmun khata cheng si mahni pianpui tawng hman luih theuh a that lohzia Lian Kunga hian a sawi a. Bihar rama an chen/awm laiin an chhungkuain Bihari tawng an hmang mai thin em aw?


Indona emaw, natural calamity hrang hrang vang emawa raltlante chu kan unaute an nih kher vang emaw ni lovin, an harsatna hriatpuia lo chhawmdawl leh tanpui chu sawrkar leh mipuite mawhphurhna a ni tih chu Lian Kunga hi a hrechiangtu berte zinga mi a nih ka ring a. Tuna Hmar raltlan Mizorama awm mekte hi, an chenna hmunah him tawh lova an inhriat tawh chuan an him theihna hnai ber state chu Mizoram kher ni mah suh se an nunna chhanhim turin an tlan ngei tur a lawm. Tihtakzeta lo hmangaihtu an unaute awmna Mizoram pan theia an awm hi an tan vanneihna chungchuang a ni. Hmar raltlante chunga hetiang rilru tenau lek pu a nih chuan IAS a tana tlak lo ber niah kei chuan ka ngai. Hetianga kan unaute tam tak manganga an tlanchhiat lai hian Lian Kunga hi Aizawl D.C. a lo ni palh ang tih a hlauhawm hle mai!

A thu ziak atangin Lian Kunga hi Mizo hnahthlak hnam (clan) hrang hrangte karah inngeih lohna leh inpumkhat lohna chi tuhtu a nihzia chiang takin a lang thei a. A chhan chu Mizoram chhunga tawng (dialect) hrang hrang leh Association tenaute chu tharum hmanga khap leh tibo turin sawrkar leh MZP/YMA te chu a fuihpawrh (instigate) avangin. A thu ziakah hian a ding nghet ngam chiah em ? Lian Kunga hian a nihna leh a hna chelh diktak nen han insawichiang leh teh se.

.

..

 

..

 
 

 

 

 

SPONSORED BY:  WWW.ZOGAMONLINE.COM  &  WWW.ZOMISTORE.COM  &  WWW.ZOLAWKTA.INFO

 

.

Created (2006) & Maintained by J. Thang Lian Pau