ARTICLE (MIZO)

 

 
..

 

..
 

..

 

MANIPUR STATE A MIZOTE DINHMUN

- Manipur Zohnahthlak Analyst.

(M.Z.P Member)

 

 

Tunlai hian chanchinbu thenkhatah Manipur State Mizote dinhmun ziahlan a ni thin a, C.Y.M.A leh M.z.pte mawhchhiat zawnga Dt.7.11.2002 a Vanglaini chhuak a S.Lalsangzuala, Chaltlang Lily Veng in a ziakah khan YMA Ram leh hnam humhalh kum leh M.Z.P ZOFEST 2002 nghawng niawm taka a rawn tarlan khan mi khei riau mai a, chuvangin thil ka thlir ve dan han tarlan ve tul tlatin ka hria.

Manipur state a Mizo awmte hi an harsa ve hrim hrim a, Manipur State chhunga Zohnahthlak mi nuaiteltehmeuh karah anni inti Mizo bik (Lusei tawnghmang) khi a lununga chhiarin mi sangnga(5,000) vel an awma, Gangte ho khi singkhat leh sangnga (15,000) vel an awm bawk a. A tlem berte khian midangte rual pawla awm an tum lo .reng reng a, Mizo rawn ni duh tam tak Mizo thei lovin an dangbet tlat a, Gangte ho Mizo a rawn in chhunluh dawn lai pawh khan lo pawm lo turin C.Y.M.A leh M.Z.P Gen. Hqrs.te kha nasa takin an rawn nawr a, C.Y.MA leh M.Z.P Gen.Hqrs. lamin, ‘Mizo a rawntel duh na na na chu’ tiin Manipur a Mizo ho ngaihdan chu hnawlin an pawm lui tawh zawk a, khilaia inti Mizo bikte duh dan chuan lak luh loh an duh a ni. Engemaw hlekah an Zohnahtlak pui unaute khi helamah an rawn hek char char reng a.

Kum 1993 velah kha chuan unau Kuki ho sual zia sawiin an rawn zualko tluk tluk thin a, chutihlai chuan unau Paitete chu fel an tih thu an sawi thin a, an tan Naga tih thinur a hlauhawmzia an sawi nasa hle thin bawk. Anni zualko na thu avangin khatih laia Kuki leh Naga indo lai pawh khan kan unau Kukite kan tanpui lo tawh a, kum 1997-a Paite leh Kuki buai chhoh vel atanga tun thlengin unau Paite ho sual zia sawiin an rawn zualko leh tluk tluk tawh thung. Meitei tih thinur a hlauhawmzia ha hipin an rawn sawi ve leh tawh bawk. Keini Mizoram mipui lahin a engmah chhut chiang lovin an rawn zualkona thu hi kan lo pawm hmiah zel a, Zohnahthlak hnamdang ho tan khian ngeiawm ve tak chu an ni. Ka hriat ve theih china thil thlengte a indawt dan ang deuh in tarlang ta ila a chiang uar mai awm e.

1. Kum 1997-a Paite leh Kuki indo lai khan MZP hruaitute President Pu Lalmuanpuai Punte leh executive members pathum Lalvenhima Hmar, Singtluanga leh F.Lalruatliana (Churachanpur zirlai hruaitu hlui, Aizawla lo pem)te chu Mizoram sorkarin M.L.A rual ho a tirh chhoh hma daih khan lo han kalin Zohnahthlak zirlai pawl ho leh Zohnahthlak Tribe hrang hrang hruaitute kawm kualin theihtawp chhuahin remna atan hma an la ve a ni. Zohnahthlak zirlai pawl ho zawng zawngin a huho in Mizoram sorkar hnenah an harsatnate sukiang tura hmalak pui tura ngenna Joint Memorudum duan sakin Manipur M.Z.Pte chu sign tir an tuma, an duhlo phawt a, ‘A indote hnam pahnih Kuki leh Paite hovin sign hmasa phawt se’ an ti a. An ni pahnihin an sign hnu-in sign tir an tum leh a, an duhlo leh a. ‘Hnamdang hovin han sign leh phawt se, keini chu a hnuhnungah le’ an ti leh a. Zohnahthlak hnamdang zirlai pawlin an sign vek hnuah sign tir an tum leh pawhin an la sign duh lo ta cheu a, “Kan tan sign ve a him lo, Meitei hovin an haw palh ang e” an ti leh zel a. ‘Midang zawngin an sign vek tawh si a, sign ve loh chu a tih chi lovang’ ti a M.Z.P President Pu Lalmuanpuia Punte in a nawr luih na avangin an sign ta hram a.

2. Khatih laia harsatna karah khan Manipur Zohnahthlak hnam zawng zawngte khan Manipur sorkarin a ngaihsak loh zia leh buaina pawh chinfel lam aia buai zual zel an duh zawk a an hriat avangin Mizoram sorkar hnuaia awm ve mai dan ngaihtuah (Greater Mizoram process)te pawh an sawi ri nasa hle a. Mahse inti Mizo bik ho erawh chuan an duh lo hle a, chutiang lam hawi thu reng reng chu sawi pawh sawi ri hauh lo turin M.Z.P palaite chu thurawn an pe nasa hle. Zohnahthlak hnamdang hovin Greater Mizoram an duh vek lai pawhin an duh ve hauh lo. An sa himna tur chauh ngaituahin Zohnahthlak pumpui tana thil tha tur pawh an duh ngai lo.

3. Kum 2000 khan Meitei hel hovin Churachanpur District a Zohnahthlak mipuite hnenah chhiah khawn an tum a, Churachanpur District chhunga Zohnahthlak sorkar hna thawk zawng zawng hnenah an hlawh 2 % pe thin turin an phut a, Zohnahthlak hnam hrang hrang hote chuan, “Helai hi Meitei ram a ni lo, kan ram a ni, Meitei hnenah chhiah kan pe lovang” tiin nasa takin an dodal a. An dodalna thuziakah Manipur a Zohnahthlak hnam tinin signature pek tur an ti a, khilaia inti Mizo bing ho bawkin an sign duhlo leh a, hemi tum hian kan unaute ho an rilru a na hle. Zohnahthlak hovin an dodal nasat em avangin Meitei hel ho pawhin chhiah chu an khawn lui ta bik lova, Zohnahthlak unaute zarah sign ve duh lo tu inti Mizo bing ho pawh chhiah chu an awl ve ta thova.

4. Kum 2000 M.Z.P Assembly Churachanpur ah thupuiah Unau kan ni tih hman a ni a, a fuhin unau Zohnahthlak dangtes pawh an phur hle a ni. Chhawrpial Run a Function neih thin bakah Churchanpur khawpui dung tluana inunauna kawngzawh huaihawt tum a ni a, Zohnahthlak unau Enga tawng hmang lo ho phei chu an phur takzet a. Mahse khilaia inti Mizo bing ho bawkin Meitei ho thirim an hlauh vangin an han duh lo leh tlat mai a, a buaithlak thei khawp mai. An chhuanlam tur tingin kawngzawh tum ni tak kha Imphal khawpuia Meitei pawl hrang hrang ho tangrualin Manipur state sahthlak duhloh entirna Rally neih an tum ni tak a lo ni hlauh mai a. All Manipur Students’ Union (AMSU) hruaitute pawh Imphal atanga lo tlan chho in M.Z.P hruaitute nen an inbia a, anni AMSU ho chuan Rally neih ni kher chuan chutiang kawngzawh chu neilo turin an rawn ngen a. M.Z.P hotute pawhin zahawm an tih avangin nidanga sawn mai an hnial loh thute an lo hrilh a. AMSU hruaitute chuan Rally ni a nih loh chuan nidang chu engmah sawiselna an neih loh thu sawiin lawm takin an haw leh a. Mahse inti Mizo ho bawk chuan nidanga kawngzawh pawh chu an la duh lo ta cheu mai a, M.Z.P hruaitute rilru an tina hle a ni. A thenin tih tlang an duh a, a thenin inti Mizo hote’n an duh loh chuan zawh loh mai tur an ti bawk a; rei tak an sawiho hnuah rilru na tak chungin thulh an ti tlu ta a ni.

5. Kum 2001 laihawl vel khan ZRAte’n inti Mizo mi thenkhat hnenah pawisa an dil a, an dil zawng zawng hi a vaiin cheng nuai 15 vel a ni a, Mizo People Convention (MPC) hovin theihtawp chhuaha hriatthiamna an ngenpui hnua hma an sawn theih loh avangin an mangang chu Aizawlah an rawn zualko a. Pu Tawnluia, Home Minister in an harsatna hrethiamin MNF Sub Hqrs. Manipurte hnenah lo buaipui turin phone in a han hrilh a, anni’n theihtawp chhuaha hma an lakna zarah ZRA lam chuan Rs. 50,000/- in an in hrethiam ta a. MPC lam chuan lawm tak aruangin, “Kan sawi feltep tawh a, MNF ho an lo inrawlh khanglang a, MNF ho vangin Rs. 50,000/- kan chawi phah” an ti ta hlauh zawk a.

6. Kum 2001 vek kum tawp lamah hetiang deuh bawk hian Manipur-a inti Mizo neinung deuh deuhte’n thawhlawm tam tham deuh tak khawnna lehkha an hmu leh a, chutah chuan an mangang Mizoram ah bawk an rawn zualko leh a. MNF lamin inrawlh na chi nia an ngaih tawh loh avangin M.Z.P leh C.Y.M.A in lamkal intirh an tuma, C.Y.M.A leh M.Z.P hruaitute chu inbe rawnin “M.Z.P an kal dawn tho avangin M.Z.P hmalakna ngaihchan phawt nise, chumi hnuah a tul dan angin YMA lam chu la chetchhuah ve nise” an tih avangin M.Z.P hruaitu pahnih Pu Lalmuanpuia Punte leh Lalmuanawma Mathipi General Secretaryte han kalin ZRA hruiatute an han dawr leh a. An han thlen hian MPCte’n an lo dawngsawng a, ZRA hruaitute dawr dan turte an sawiho laiin MPC lam chuan an aiawhtel ve zel an dil a. Mahse M.Z.P hruaitute chuan MPCtetel ve tula an hriat loh avangin anmahni chauhin an dawr thin a. ZRA hotute vawi thum an dawr hnuah a final na tur an sawi dawn tum inbiak vawi 4-na turah chuan thu final anih dawn tawh avang leh an final dan tur thu tha lam ni tawh a an hriat avangin MPC hruaitu mi 2te chu M.Z.P hruaitute’n an remtih angin antel ve ta a. Tichuan ZRA lam hruaitute chuan Mizoram atanga M.Z.P hruaitute meuhin an rawn ngen avangin an pawisa dil pawh an sut leh thu an lo hrilh a, lawm takin an inthen ta a. A hnulamah chuan MPC hruaitute chuan, “A tir atangin kantel ve an phal lova, vawithum an inbiak pawhin an sawifel thei lova, vawikhat kan hantel pui ve a, kan sawifel thei ta mai” an ti leh pek bawk.

7. Hun engtiklai emaw atang khan Manipur ah khian Tribal vrs. Meitei boruak a kal na ta hle a, Inti Mizo bik ho khian, “Kan neutral e” an ti khanglang a. All Tribal Students’Union Manipur (ATSUM) hovin tlangmi bik tan seperate administrative unit an demand a. Manipur M.Z.P ho pawh ATSUM ah antel duh lova, M.Z.P Gen.Hqrs. Aizawl in, ‘Unaute intel khawmnaah chuantel ve zel tur’ ti a an nawr luih na avangin pawnlang deuh chuan antel ve a. Zohnahthlak zirlai ho intel khawmna Churachanpur District Students’ Union(CDSU) ah pawh chuti bawk. ‘Kan neutral e’ ti si khian Meitei lamah an tang ru tlat bawk si a, midang tan khian an ngeiawmin hnawksak tak chu an ni.

8. Manipur a Zohnahthlak silai keng ho inzawmkhawm Indigeneous Peoples’Revolutionary Alliance(IPRA) hovin, “Keini Zohnahthlak ho hnam chi hrang hrangte hian zirlai pawl kan nei vek a, Zirna In(Institution) zawng zawngah Unit an nei vek mai a, Institution pakhatah tribe based zirlai pawl an ding tam lutuk a, hei hian inpumkhatna a tichhiat theih avangin thiat vek a tha, Area wise hi chuan la awm zel se” an ti a, Zohnahthlak zirlai pawl dang zawngin an zawm vek theih laiin Manipur M.Z.P chauhin, “Kan Hqrs. Aizawl kan rawn phawt ang” tiin harsatna an siam a ni. M.Z.P Gen.Hqrs. lam chuan IPRA ngaihdan hi dik an tihpui avang leh unau midang hovin an zawm vek chuan zawm lotu nih bik chu a dik love tiin zawm ve tuirn an hrilh a. Chu pawh chu zawm tha duh mai lovin zawm ve tul an tih loh thu lam an sawi neuh neuh reng a, MZP Gen. Hqrs in Manipur M.Z.P an suspend in a nang zui ta a, engtinnge a kal zel chu hriat zui a ni ta lo.

9. M.Z.P in ZOFEST 2002 an han neih dawn khan MZP chuan April thla tir khan kan Asst. Gen.Secy. VL.Krosshnehzova leh Pu Lalmuanpuai Puntete han tirin an thil tih tum dante han sawiin boruak an han thlithlai a, khilama inti Mizo bing ho bawkte chuan an lo duhlo leh hle mai pek a. Manipur M.Z.Pte chu lo fuihpawrhin M.Z.P lamkalte pawh chu an lo hnial nasa hle. Manipur M.Z.P hruaitute pawh chuan MPC hruaitute sawipui phawt turin thu an lo rawn a. Mahse M.Z.P function tur anih avangin MPC sawipui tul an ti lem lova.

Zofest 2002 kha an dodal nasa hle a, M.Z.P in an huaihawt theihloh chuan CDSU huaihawt tir tum anih thute MZP Gen. Hqrs. hruaitute chuan an hrilh bawk a. Chhuanlam dawrawmtete, “Unau Paite hovin an duh lovang” tihte an sawi a ni awme. Paite ho chu an phur hle zawk tih an han hriat leh si hnu chuan ‘Paite ho an phur lutuk a, engemaw tak ani ang’ tih angreng vel thu fahrah tak takin chhuanlam an siam zel a. ‘Engtinnge kan tih bahlah theih ang’ tih ringawt an ngaihtuah emaw tih mai turin hmalakna an chhaih hnufual a ni. A hlawhtlinna turin engmah an ti tha duhlo reng reng niin M.Z.P Gen. Hqrs. hruaitute’n an sawi. ZOFEST palai Aizawl atang kal hote pawh khilaia Mizo ho inah vek an thleng a, mikhual zawng zawng deuh thaw chu an thlen inte’n ZOFEST tha an tih loh thu an mikhualte an hrilh a ni awme.

10. ZOFEST 2002 an han zova, Mizoram palai an haw thlak hnuin Zohnahthlak zirlai pawl zawng zawng in sign tur lehkha Bond of unity an tih mai an duang a, (Mizo tawngin hetiang hi a ni) ‘M.Z.P Gen.Hqrs hamalakna a ZOFEST 2002 hlawhtling taka huaihawt a ni hi lawmawm kan ti a, Zohnahthlak hnam hrang hrangte inpumkhatna atan hun lo kal zel turah M.Z.P Gen.Hqrs. hmalakna kan thlawp tlat zel ang’ tih thu chu Zohnahthlak hnamdang zirlai pawl zawng zawngin an sign hnu in Manipur M.Z.P in an sign ve duh lova, ‘Kan Gen. Hqrs. kan rawn phawt ang’ an ti a ni. M.Z.P Gen.Hqrs. chuan sign ve turin thu an pe a, an sign duh leh si lova; a thu ah hian han sign duh loh na tur engmah a awmin a lang si lo. Tichuan sign ve ngei ngei turin huntiam neiin thu an pe ta a, MZP Gen. Hqrs. huntiam chhunga an sign duh tak loh avangin Manipur M.Z.P chu rilru na takin an suspend ta hial nghe nghe a ni. Suspend order nena han kal MZP President Lalchhandama Ralte leh Asst. Gen.Secretary VL.Krosshnehzovate hnena an sign lohna chhan an sawi dan chuan ‘MPC in an phallo’ tih a ni.

11. ZOFEST 2002 Video Local T.V a tih chhuah a nih khan Manipur lam chhuak Mizo pakhat chuan L.P.S T.V Operatorte hnenah, “Kha Film kha lo chhuah tawh suh u, Mizo hnam tan a himlo.” tiintelephone in a lo han hrilh a, Policete hial an thlen phah nghe nghe a ni. ‘Enge kha ZOFEST film chhuah kha Mizo hnam tan a him lohna ?’ tih hi zawhna lian tak a ni.

12. Thawhlawm khawn thuah hian Manipur state khi rambuai anih miau avangin thawhlawm khawnluih (extortion) hi chu a tam em em a, khilaia inti Mizo ho khian hriatthiam an tum lo hrim hrim niin a lang. Kuki anni emaw, Paite anni emaw tute pawh khi an in khawn tawn hlawm a ni. Entirnan :Kuki in Hmar hnenah an dil changte, Hmar in Paite hnena an dil chang pawh a awm. Hnam anga la vungin an hnam hruaitute’n an buaipui ve chuk ngai lem lo. Anmahniin an in sawifel mai zel, tam tak an demand pawhin in dawn hniamin tlemte pein an inti lungawi ve fo thin bawk.

Thuthang pakhatah chuan tuna ZRAte’n pawisa an demand mek Pu Singate chhungkua pawh khian dawn hniam a, tlem deuh peka in tih lungawi mai theih anih beiseiin inbiak a duh hle a; mahse inti Mizo bing ho hruaitute’n an remtih loh avangin Pu Singate chhungkaw hlau chung chung an tlanbo tir a, an dawrte pawh a inchhawkin an nghah sak a ni awm e. Chu chu ZRA lamin, “Anmahni an awm chuang si lova, lo hawn sak tawh suh u” tiin an khar tir a ni awm e. Chu chu helamah a vung thei ang berin ‘an dawr hawn pawh an awih tawh lo’ tiin an rawn zualko ta a ni.

13.. Thil an tihna kawng engkimah khian an bula awm, an chenpui unau Zohnahthlak puite thurual pui zawngin an awm duh lo reng reng a, ‘Mizorama lam kan rawn phawt ang’ tiin an hnial thin a. He lamin thil zau taka thlira kan ngaihdan an zawm leh duh thin si lo. M.Z.P leh YMA huang chhungah chuan helamin thutawp kan neih avangin an duhloh zawngte pawhin thu kan tih tluk theih thin avangin helam (Mizoram) zawm lo pawl, khilai a thutawp siam thei reng tur (Manipur a Hqrs. nei) enge pawl hi an siam reng thin bawk. Tunlai hian MPC khi Mizoram a NGO ho (YMA, M.Z.P etc.) ah an tla na tawh lo tih hriain pawl thar Mizo Core Committee (MCC) an din a. M.Z.P ah Mizoram an zawm tawh lova, an zawm chhun YMA in an duh loh zawngin thu lo nei palh ta se thudang rel theihna tur pawl (Forum), MPC idea vek a kal tur; lang lova MPC thunun thin tute’n an duh ang anga an la thunun reng tur Puppet a ni.

Thuthang dang pakhat leh ah chuan tunah khian inti Mizo ho khian anmahni Mizo ho zingah khian pawisa an khawn ve mek a, ‘A pe duh lo chu Mizo atanga ban tur’ an ti a ni awm e. Tihluihna a pawisa khawn an duh loh thu helamah an rawn thlen mek laiin anni pawhin an khawn lui ve mek tho niawm tak ani. ‘Mizo atanga mi ban theitu anni em?’ tih pawh hi chhut tham tak a ni.

Hetiang hi ka thil thlir va dan anih avangin ka hmuh ve dan chuan unau Zohnahthlak dang silai keng hote hian pawisa mamawhna aiin tihbuai hrim hrim an chak vang zawk niin ka hria. Kei chuan Manipura inti Mizo bing hote’n harsatna an tawh khi an phu ve reng niin ka ngai. Helam atanga kan han ngenna hi an zawm lo anih pawhin helamah hian tute emaw lakah kan kut hi lo za ve ngawt lovin ngaihdan chin tawk kan neih a tul niin ka hria. Manipur hri chhia khi Mizoramah i seng lut ve lo hram ang u.

Amaherawhchu a tawp bera tarlan ka duh em em chu, Manipur State a inti Mizo bik ho khi inti Mizo bik thei khawpin an Mizo a ni tih hi ka sawi duh ve thung a ni. Mizoram buai lai khan Mizoram State chhehvel a Zohnahthlak chenna zawng zawng ah hian sipai an hrang em em a, khatih hunlai khan Mizo nih hrim hrim hi a hlauhawmin Jail tan phahte pawh a awl em em a, unau Zohnahthlak dangte an Mizo ngam miah loh hunlai pawh a hlauhawm kara lo Mizo tlang zak ngamte an ni thung.

.

..

 

..

 
 

 

 

 

SPONSORED BY:  WWW.ZOGAMONLINE.COM  &  WWW.ZOMISTORE.COM  &  WWW.ZOLAWKTA.INFO

 

.

Created (2006) & Maintained by J. Thang Lian Pau