ARTICLE (MIZO)

 

 
..

 

..
 

..

 

ZORAM HI KAN RAM ANI

- Muana Hangshing

 

 

Khawvelah hian mi chi hrang hrang, hlawm hrana thliar theihin kan awm thliah a, historically a thalhtu thuhmun, hnamzia leh nunphung inangte chu hnamkhat a inchhalin, kan hnamzia leh nihphung vawnhimna atan Sorkar hran leh inrelbawlna hran nena khawsak kan duh a, Chutiang dinhmun a dintir theitu chu politics tiin ram leh hnam hmangaihtu inti ten politics kan buaipui thin.

 

Keini Zohnahthlak intite pawh kan chhuahna Chhinlung a ngaiin, India hmarchhak ram a chengte, Myanmar tlangram a chengte, Bangladesh ram hmun thenkhat a chengte chu unau leh chhulkhat kual angin kan inchhal thin. Heng Chhinlung chhuak intite pawh hian mahni nihna nia kan inhriat leh miin kan nihna nia min vuahsak hming hran hran kan pu hlawm a, India Independence dawn 1947 khan Zohnahthlakte pawhin inrelbawlna mumal deuh neih theih inbeiseiin tanho dantur kan ngaihtuah a, Chumi atan chuan April 22, 1947 khan Aizawl atanga hnaite Muallungthu khuaah Zohnahthlak hnam hrang hrang 46 lai aiawh kalkhawmte chuan thawhhona tur hming pakhat neih tha an ti tlang a, Chumi atan chuan a awmsa ring mai lova an hnam nihna theuh len theihna leh hmantawm theih ngei tur hmingthar sak an relthlu a; chu Hnam hming intawm (nomenclature) atan chuan Mizo tih hi an lo thlang ta a ni.

 

Hengho zingah pawh kan chenna azirin kan tawng kalhmang a inanglo nuala. athenin R kan hman tam laiin a thenin G kan hmang tam deuh a; mi thenkhat chuan R group leh G group tite pawhin an sawi bawk thin reng a, Heng G group kan tihho pawhin an tawng kalhmang - Zozam(Zamzo), Lamdang (Danglam), Ngasa (Sangha) etc. ang zulzuiin hnam thuikhawmtu hming atan Zomi (Mizo) hi an tana hman nuamzawk leh rem zawkah an ngai a, Kan unau tamzawk Myanmar awp ram a mite leh Manipur Sorkar hnuaia awmte phei chuan an hmang mah mah zawk a; Abikin tuna Mizoram kan tih chhunga khawsa velo ten anmahni hriatthiam zawnga an nihna an lo vawnhim ve chu kan vanneihna a ni a, Mizo neitu leh Zomi neitu te hi thuhmun kan ni a, thih leh ruam khatah, dam leh tlamng khatah tia tang tlang thin te kan ni.

 

Kan ram politics inher zelah Chhinlungchhuak unaute chu Sorkar hrang hrang awpna hnuaiah kan lo inthendarh zui leh ta bawk a, Hetia ram hran a Sorkar hran theuhin min awp chu tha ti lovin ramkhata mahni ro inrel theih dan tur ngaihtuahin movement kan han siam ta a, Chu Mizo/Zomi movement in Mizote/Zomite ram tura a hung bik theih chu tuna Mizoram kan tih hi alo nita ani. Ram hran hran a awm leh Sorkar hrang theuh awpna hnuaia awm kan nih ang ngeiin kan nunphung leh khawsakzia te pawh a lo inanglo nual reng a, a bikin kan tawng phei chu dialect hrang hrang a lo awm ta reng a ni. Chutih lai chuan kan tawng hman tlanglawn ber leh kan inbiak pawh theihna ber Lusei tawng chu Mizo tawng ang a ngaihna a lo awm chho ta a, aloh theihloh chin pawh a awm reng a; Amaherawhchu, anihna tak ah chuan kan dialect hrang theuh pawh hi Mizotawng a ni a, kan hnamzia leh nunphung te pawh hi Mizo hnamzia a ni vek a ni.

 

Achhan chu heng Zo hnahthlak hnam hrang hrang ten Mizo hi kan nomenclature atana kan siamchhuah anih avangin a siamchhuak tute nihna theuh chu Mizo nihna a ni vek lo theilo a ni. Kan sawitak angin kan awmna a zira kanzia a lo hran hret hret angin literature lamah pawh min awptu leh min enkawltute nihna pawh kan copy lo thei lova, kan letter ah pawh alphabet a "R" hmang tam deuh leh "G" hmang tam deuh kan awm angin, kan ram pawh a thenin Zoram kan ti a, a thenin Zogam kan ti a, thenkhatin Sazu, thenkhatin Zusa, thenkhatin danglam, thenkhatin lamdang, chutiang zelin. Kan hnam hi tu chhungkaw malin emaw kan nihna tur a tana a dinchhuahpui a ni lova, Chhinlung chuak inti unauten ngaihtuahna hmang tlang a, mi min vuah pawh nilo, keini ngeiin kan nihna atana kan pawm hnam hming intawm chu a ni. Chuvangin Mizofa USA a mi tan pawh a ram a ni a, Myanmar awpchin ram a chengte, Bangladesh awpchin ram a chengte leh Indian Union chhung a State hran hran a awmte tan pawh Mizoram hi an ram vek a ni.

 

Amarawhchu, a hmasawnnate venhimna leh enkawlna kawngah chuan a chhung a chengte chuan mawh kan phur bik lo theilo thung. Vawiin nia mi thenkhatin neitu bik riau nia an inhriatna hian Mizoram State in a huamphak ve loh ram a chengte a ti mikhual a, achhung a chengte ngei ngei pawh ze hrang hrang neite kan nih ve tho na ah ngaihdan hrang a put tir a, kan common language Lusei tawng(Mizotawng kan tih tak) bik chauh Mizo tawng a ngai leh chumi hmanglo te chu Mizo nilo ang a ngaihna phei chuan kan unau tamtak a hnawt tiau reng a ni. Mizo Hnam a dintu te hian Mizo I leh Mizo II an siam lova, Mizo hi engti zawng mahin a grade in an thenlo tih kan hriat a tha. Tuna Mizo tak tak nilo kan tihfo te hi anihna takah chuan Lusei tawng hmanglo leh tawngpai anga kan ngaihho an ni deuh tlangpui a, Hnam nihna hi tawngah ainnghat lova, thizen a inzawmna hi a ni zawk. Foreign a awm pawh Mizo tawng thiam lo mahse Mizo a ni thova, Mizoram a awm ngei ngei pawh Sap emaw Vai emaw thlah an nih chuan Mizotawng thiam hle mahse Mizo anni chuanglo. Mizo hmeichhia in Sap tlangval a neih chuan a fate chu Mizo tawngin tawng mahse Sap anni tawh tho. Chutiang bawkin khawi lai a mi pawh Mizotawng thiamlovin, kan hnamzia pawh hre tawhlo khawpin lo bo ta pawh nise, a hnam nihna tak chu Mizo a ni tho. Vairama kan Mizo chhungkaw awmte hian Mizotawng theihnghilh vek mahse an Mizo nihna an paih thei chuanglo. Chuvangin, keinin Mizo pianzia leh tobul kan chhuichian loh zawk vanga Mizo tak leh taklo awm anga kan sawifo te hi hnam a kan chianloh vang zawk a ni a, tawng hmang a hnam kan lo thliar tum ngawt pawh hi Mizotawng kan hriat tlem vang zawk a ni. Hnam a chiang a kan inhriatna hi kan chianlohzia tarlangtu mai a ni.

 

Tunlai hian foreigners kan buaipui a, kan rama thil duhawmlo lo thleng thin nen inkaihnawihin kan hria a, a dikna chin pawh a awm ang; thilsual hi a tha lova, mihring sual pawh an thalo, khawchhak lam atanga damdawi thalo rawn kengluttute ang bawkin Silchar lam atanga rawn phurluttute pawh an tha chuanglo. Zu sak hi a thalo em em a, Chutih rualin a saktirtu leh a chhawrtute pawh an tha chuanglo. Heng thil thalo hi chu engmi pawhin tise kan do in kan dem ngam tur a ni. Khawchhakmi zawng hi haw vek se ruihtheih thil hi kan ramah a rem ang em tih inzawt ila tunge chhangdik thei ang. Engpawh sawi thin mah ila, kan politics leh kan rilru in a huap chin a zim na na na hi chuan kawng thui tak a kal theihloh, Mizo ten kan ram neih tuna Mizoram zimte mai, hmana Lushai Hills min tihsak thin te hi ani rih si a, chu chu khawi a awm Mizo fate ta ani a, kan khawpui Aizawl hi kan Jerusalem a ni, Zofate luahchin ram zawng tal hi chu Mizoram ah siam thei ila, tuna kan unau Sorkar hran leh sakhaw hrang biate awpna hnuai atangin talchhuak thei sela chuan kan harsatna pawh a zia deuh tur. Chutiang kan thei rih silo, kan unau Sorkar hran awp rama miten Inpui angin an rawn bel lo thei thin bawk silo nen, keinin an beisei angin kan lo chhawmdawl zo bik bawk thin silo a nih hi.

 

A enga pawh chu nise, Zofate chuan Mizoram hi kan intawm a, Chumi tih thianghlimna chu kan mawhphur theuh ani tih pawh kan hriat a tha a, Helai a awmte pawhin neitu bik nia inngaihna kan neih thin te, Mizo bik riau a kan inngaihna leh mi hriat ang kan hriat ve loh a bikin tawng thu-hla a midang te tawng kan va hriatloh vanga hnamdang ang a kan ngaihna thin thinlung dahbo ila; Zofaten kum 20 lai hreawmna leh harsatna engkim tuara kan ram tana kan beihna in a hrinchhuah tuna Mizoram chu Zofate himna kulhpui a nih zel theihna tura tanlak hi kan tih tur a ni. Mizoram State chu khawiram ami pawh Zofate tan an State a ni a, Mizoram Sorkar pawh an Sorkar a ni; Chumi kan hriat vanga helaia kan hnam lo sawrzim emaw kan ram lo intih neitu a midang tana intih mikhualna leh midang tana ngaihdan hrang put theihna tur khawp a thil kan tih chuan kan thiamloh a ni ve tho tih kan hriat a tha.

 

Tunhma a kan zirlaibu ah pawh Mizoram a dil lianber chu Rihdil a ni a, Burma ramah a awm kan tih thin kha, Rihdil awmna khi Zofate luahram a ni a, Burma Sorkar awpna ah a awm rih mai ani tih thangtharte rilru a tuh tumin a ni lawmni zirlaibu ah te kan telh ni.Chuvangin, Zoram hi kan ram ani tihah i chiang ang u. 

.

..

 

..

 
 

 

 

 

SPONSORED BY:  WWW.ZOGAMONLINE.COM  &  WWW.ZOMISTORE.COM  &  WWW.ZOLAWKTA.INFO

 

.

Created (2006) & Maintained by J. Thang Lian Pau