F A Q

 

 
..   ..
 
..

 

..
 

Hih website banchi banga hong piang?

Jan. 17, 2006 zanin SSPP HQ., Mizoram in kum thak O.B. Meeting masa pen kineiin, tuaah tu kum sunga 'malakpi ding sawm' neih dingin thupukna a kibawl a, tua lakah a lina pen 'March 21 (Zomi ICT Day) niin SSPP HQ. Mizoram website honkhiak ding,' chih ahi.  Huai seem dingin leh hoih a sak banga bawl dingin thuneihna pumpi pia-in Vice President, J. Thang Lian Pau @ Zolawkta muang takin a kiseh ngal ahi.

 

A kisehna bangin Zolawkta in seem tou a, March 21 niin zawh siang hi kei mahleh, a ni a tun ziakin ki-release veve a, March 25, 2006 niin a kizo siang pan hi.  Hiai bawlna dingin Pawlpi pan sum cheng khat leng koih hi nai kei mahleh, Zolawkta in phatuam ngai taka hong bawlna-ah SSPP HQ., Mizoram a kipak mahmah hi.  Huai banah Australia gama om sanggampa Paul Khaipu in i website domain name [www.sialkal.org] hong leisaknaah leh hong renew-sak zel a sawmnaah a kilungdam petmah a, a sep a bawlna zelte uah Pasian in gualzawhpih zel dingin SSPP HQ., Mizoram in deihsakna sang pen a kipuak hi. 

 

Amin leh amel : Bang dinga Sialkal Online kizang?

I website mina 'Sialkal' a kizatna in a ziak chi nih a nei hi.  A masaah 'Siamsin Pawlpi' hiam 'SSPP' hiam pen i Gen. HQ. tanvo dinga a kingaih ziak ahi a, 'Siamsin Pawlpi' hiam 'SSPP' hiam ngen zang ta leng den chianga i pawlpi sunga midang ten leng website a bawl ut lai chiat ding ua, huai hun chianga kitheih polh hiam min kinai lua hiam ahih loh nang deihna ahi hi.  A nihnaah SSPP HQ. pen Mizoram pum huap ahih bangin Mizoram apan ahihna etsakna leh Mizorama i gam neih uh 'Sialkaltang' ahihna taklatna leh 'SSPP' tawh a kibangin 'Sialkal' leng a min a than ding deih ziak ahi hi.  Sialkaltang luah masapen i pu i pate ahi vua, British kumpi in hong awp sungin a gam neitu hihna a hon piak uh, Mizoram sunga i gam neih sun uh ahi hi.

.

Hiai website home page, top frame-a text colour-te hi SSPP puanlap colour zuia kibawl ahi hi.

 

Bang dinga website dang min dawk?

Sialkal.org in website space a neih nai loh ziakin www.zolawkta.info space kikawm ahi hi.  Tua bana limte ah zolawkta chih thumal a kikoihna in limte pen i pawlpi lakkhop tam lo a, Zolawkta' kaihkhopsa a kizat ziak ahi.  Space a manlanga neih a ki-ut mahmah hi.  Zolawkta.info space hong lemloh kik chiangin Pu S.Guite thusiamna tawh tun www.zogamonline.com space kizang leuleu hi.

 

SSPP HQ. Mizoram' Thuchah:

Hiai pen Siamsin Pawlpi pumpi in website kichian khat leng i neih nai loh banah, tu dinmunah Zomi teng baih taka thu kitheihna ding omsun internet hi phot ahih ziaka kingai poimawha kibawl ahi. A sungah i pawlpi leh i nam adinga poimawh hia theih thu tam tak a kikoih a, mabanah hih buchintoh zel sawm ahi a, a buchin seem nadingin a kua peuhin ngaihdan leh enkol a hautak ziakin panpihna sum bang leng bang hun peuhin piak theih gige ahi.

 

Hiai i website hi a deuhin Siamsin Pawlpi pumpi adingin leng masawnna hiin kithei a, hiai in i pawlpi masawn zelna leh i nam kipumkhatna a hong tun ngei kilamen a, a zang a kua peuhin phattuampih ngei dingin SSPP HQ., Mizoram in deihsakna sang pen ka hong puak uh hi.

 

A Hihna Khek:

A chilin SSPP aituam website himahleh i nam phattuampih zawkna dingin hiai bangin Mizorama Paite nam pumpi huamin a kikhek lamdang kik ta hi.

 
 
 

 

 

 

SPONSORED BY:  WWW.ZOGAMONLINE.COM  &  WWW.ZOMISTORE.COM  &  WWW.ZOLAWKTA.INFO

 

.

Created (2006) & Maintained by J. Thang Lian Pau

.