SPEECH

 

Muana Hangshing | Dr. H.Thansang | Haukhum Hauzel IAS

 

 
..

 

..
 

..

 

Mizoram Paite Tribe Recognition lopna, Mimbunga

Pu Muana Hangshing

President, PNC, Mizoram Hqrs. & Chairman, Mizoram Paite Tribe Recognition Celebration Committee' thugen
 



Pu Chairman,

Zahtaakhuai Chief Guest, Guest of Honours, Distinguish Guests  leh Nam ittu hong paikhawm tengteng tungah, hiai hun poimawh takah dinmun sangtak na hon luahsakna uah ka kipaak a; mihingte deihthusama lem i geelte Toupa’n hon lemsakpihin hiai hun i zang thei a, i biak Pathian kiangah leng kipahthu i gen ngal hi hen la.

Namte bawlpa in i namte kepbitna ei khutah a nga a, huaimah theiin makai masa ten nam kivaipuakna hoihtak, tup leh ngiim kichian tak tawh hon pi ua,  Zomi nam sunga Paite kichite adingin Paite National Council(PNC) bang a na bawlin, Zomi mun tuamtuama khenzaaka omte gawmkhawm bang, Mizorama omte adinga vaihawmna kichian neih bang, India Danpi sunga  nam khata guanluutte bang tup leh ngima neiin hon pi uh hi.

Tu-a i lawhchin, kipaka i lop, PNC thiltupte laka khat  tungtangah leng, a chituhtute panlaakna, a tawmtute kuhkalna leh a paaksuang thei ding khopa semgimtute sepgimnate Toupa’n hon vualzawl a, tuate ziaka lawhching lel i hi, chih i theih a poimawh.

Hiai i lohchinna dinga chituh  dingin April 10, 1980 in Teikhang khua-ah makai tuamtuam mi 17, khaw 6 pan paikhawm ten Mizoram Paite Organisation (MPO) a na phuan ua, tua-a mawhpawtu dingin Pu L. Thangzakap, President; Pu Phungkhai, Vice; Pu Dalkam, Secy.; Pu Hnunlian (L), Secy.; Pu K. Thangzalian, Treasurer leh Pu Thangthui, Fin. Secy. baanah Executive Member ding mi 29 a na guang uh hi. Hiai MPO Conference nihveina Oct. 16, 1980 a neih in India central kumpi lam nawka nasemtu ding Action Committee guang in, tua-ah Chairman Dr. H. Thansang, Secy.; Pu K. Vungzamuan, Treasurer; Pu Chalthiang (L) banah member mi 7 a na guang uh hi. Hiai MPO mina theihbang tawka kalsuan ahih nungin, kum 1991 a Paite Nam Khawmpi Lian in PNC a kivaipuak ding i geelpuuk bangin, hiai MPO maban pen PNC in bawhzui in, tuni-in hiaibang dinmun i tung hi.

Mihingte eima theihna, pilna leh siamnaten bangtan mah hontun zokei a, eite bangmah hilo, theilo, pillou leh siamlo ihi, chih i kitheih a, Pathian pina lo tawh bang-mah tan tung zolo ihi chih i theih a, Pathian i hon sap chiangin Amah a hong pang sek ahi. Tua i nam nasepna-ah leng, kum 1980 pan i malaknate lawhching mai dinga ngaihna i nei sek a, mipite i hong lungkiak a, ei haatna-a bangmah hih theilo i hihlam i kiphawk a, Pathian i honsap apan hong lamzang thei pan hi. Huai hilo hileh, kum 1980 pan 2000 tanah  leng SC&ST tungtang Constitution Amendment  ngavei tak om a, tuate-ah leng tel tuak ahi.

Mipite leh makai ten theihbang tawka pan i laak nunga leng lawhching zolo a, mipite i lungkiak a, ei leh ei leng kimuang zolo-a i om nungin nam neipa Pathian i sam a, “Toupa, koumau theihna in zaw ka namte ka kipi zo kei un, lawhchinna ka tun zo kei uh hi; tanglaia Israel-te na pibangin ko na mite hon pi in,” chia Toupa i honsap chiangin, Toupa hon dawnna a hong tung a, “Toupa’n, ken Paite namte kon recognised khin thamta a, nou na hon recognise hoih nuam kei uh ahi zaw; kei kiangah na vui nuam dekdek ua, leitung kumpi’ recognise ngen na hi ua, na leitung kumpite kiang uah vui ngam le uchin, amau  tungah ken na sem thei ka hi” chih ahi.

Huchiin, Toupa’n i makaite tungah lemgeel siamnate bang hon guan in, vanzat ding bang a honpia a, India kumpi-a vuivaina tutna mun Paliamentary Committee on Petition-ah  September 25, 2001 in vuivaina thu hontun ua, Hiai Committee in a saitu  Ministry of Tribal Affairs-ah thu pe sawnin, hiai Ministry in Department tuamtuam, Registrar General of India, National Commission for Scheduled Cates & Scheduled Tribes leh Mizoram kumpite-ah thu hon kaikhawm in, i vuivaina tungah amau hihding a neih bangbang uh hon hih ua, hiai tungtanga a comment uh March 7, 2002 in Paliamentary Committee on Petition-ah hon pelut uh hi. Huchiin, hiai Committee in Union Cabinet pompoh dingin petou nawn pah hi.

Union Cabinet in June, 2003 in hon pomsak a, huai dungzuiin India Parliament Monsoon Session, July-August, 2002 sung ah  Augt 2, 2002 in a Bill ki pawlut a, himah leh, gamsung buainate ziakin genkhawm manlohin om hi. Huchiin, Parliament Win-ter Session, Nov-Dec, 2002  sungah Dec. 18, 2002 in Lok Sabha-ah genkhawmin Passed a hong hi  a,  Dec. 19, 2002 in Rajya Sabha-ah genkhawma Passed a honghi nawn hi.

India Danpi sunga Scheduled Tribe list (Mizoram) ah Nam 14 oma record ahi a, tu-a recognize i hih thak tawh kizuiin ei nam pen Serial Number 15-na-a telh ahi a, kuamah  nuaiah i om kei a, a tuam liauliau-a Recognised i hi, chih leng i theih ka deih hi. (The Gazette of India, New Delhi, Wednesday, January 8, 2003; Registered No. DL. 23004/2003)

Hiai recognition i ngetna tawh kisaiah zilkhiak ding bangzah hiam a om a; nam nasepna himhim ei deihbang  hehu-a taangtung theilo ahi chih bang, tha leh zung, sum leh pai tampi sen ngai ahi chih leh, PNC ihih nunga pan i laakna-ah leng PNC thu leh la leng ngai poimawh zolo, Com-mittee leng ngai poimawh zolo phialin i om a, makaite hong zinvaak chianga leng a na simmawh bawl a, “PNC ah ka om nawn kei uh; banga na hong hihlai uh,” chi-a hon na koubang om mahleh, hiaibang dinmun aleng lungkiat loh ngai ahi.

Himahleh, thil himhim a lawhchinna dingin thuakzawhna bang a ngai a, gentheih leng huam a ngai a, kipiakna taktak tawh, neek taang leng nam adia phal a ngai a, ngawl zeuhzeuh bang leng khawk sakloh bang a ngai hi. Ei adinga meetna zonna-a nam na i sep chiangin i lungke sek a, hiaibang ihih leh bel lungkiak leng baihlam mah ahi.

A taangpi thu genin, tua i nam makaite hon pi danah theihsiam ding a om; a taktak gam tung lopi-a mipite su thatho a, mipi lawpna lemtanga zanga mahni angma khuatna lamin honpi kei ua, thil hiding ngei leng a tak muhding a omma in a genkhe mawk kei ua, hiaibang kipina pen hamsa salo leng ahi tuankei ua, muhdah leh simmawh leng a thuak ua, himahleh, Jesu Kris ngei leng ami Juda ten hichi khopa a bawl nungun leng amau tatna dingin a hinna a pe lai bangin; i nam makai ten leng nam ading ahih naak leh chiin athuak hamham uh ahi zaw.

Nam ichih leng paakzu nei bang deuh ahi a, paak in leng zu aneih laiin ittu leh ngaitu a hau a, zu aneih loh chiang bel bawmtu, kemtu ding leng mu zolo sek mah ahi. Ei lawiin nam i paaksak hun bel kum nga hal khawng ahi deuh a, vangphatthuai takin tukum hi i nam in ittu a hauh kum leh nam i paaksak kum ding uh abang a,  a kipahhuai mahmah. Makaite tawlna leng i dawn zangkhai ngei dingun a ginhuai.

Hiamhaleh, hiai hun ahi nam mipite adia pilvaan a ngaih hun, Jesu in, “Ka dangtaak in tui nawn pia ua…” a chih bangin nam a dangtaak chianga tui pete nam in a phawk leh phawkloh bang leng a honglang ding a. Tua nam it-a hong kigen ten i nam a dangtaak in tui ape na uh hiam? chih leng i ngaihtuah ding ahi.

Tua i latdan-ah khenkhat in Election lamah i ngaihsutna i zang mahmah leng ahi thei. I zang ding mah leng ahi. Himahleh, nam maban ding khuala nam vanzat ding taktak hi dingin bel eilawi MLA hiam hih thil thanophuai lawmlawm hiin alang kei. Huchi hilo a, i nam mipi ten leng vote nei hi ven, amau vote zangin MLA leng ahih theih chih lama ngaihtuahna in ahih leh, nam na-sepna taktaka panlak sawmna ahihloh ziakin thil thalawphuai leng a nahi kha thei hi.

Hiai tawh kisaia i theih dinga poi-mawh mahmah  a om: Tu kum kia-in i nam a hehphuai-in a ithuai kei a, hun sawt peka pan i nam in kemtu leh ittu hih a poimawh chih i theih a, tu-a nam ittu a hong kigenten chik laiin a nam a gentheihpih in, anam adingin thuakin kal asuan a, i dinmun chiat etin nang bei leh amau bei percent-in koi a tamzaw  a. I nam sanga koi political party hiam deihtel masa a, tuate vanzata neia i nam pen a behlapna ding lela hong zang ahi uh hiam? chihte i telchian a poimawh hi.

I maban hongpai dingah i nam in sep ding poimawh mahmah bangzah hiam  i nei a, tuate laka nih i taklang ding:

Khatna-ah: India Kumpi’n hichi lawm-lawma a gam sunga kitaina, kinakna leh helna omte  bangchi-a vaivensak ding chih a ngaihsun a, tua a ngaihsutna pan gam kivaipuakna puahphat kulin thei a, tua dinga a mite lungkim lohnate kan a, amau deihna ahi thei tantana tangtunsak ding ngaihtuah hi. Tua ahih theih nangin ei lakah leng India kumpi sik leh tanga palai ten thu hong kan khin ta ua, India kumpi’n i haksatna a theikhin ta hi. Hiai Betsaida diil kitawh lai hun banga hun hoihah India kumpi hotdamna luipi-a kidiahna hunah  ei zong kidiah ngei leng, chih i ut a, kua-a  i taanga gen ding a, kua-a i taanga i sawl ding?

Nihna-ah: Unau Nagate leh India kumpi kihouna in,  unau Meiteite mitnauta sawk kha a, tu-in unau Meiteite mit sip mahmah chih i thei hi. Amaute mitsip in a baan uh a hon vai ding ua, huai huna hon vai khakpi pen ding uh eilawi ihi. Huai hun chianga bang chi-a kiveng a, bang phaw zang a, kua tungah a mawh i khusak dia?

Hiai ten i innsung hong lut veve ding a hi a, i ngaihtuahna leng i letsak deuh a ngai hi. Innkuan leng i kinak a, i kisiat leh mite’n hon zahtaaklo ua, inntuama om leng i ki-it a, i kihuai siam leh mite’n hon zahtaak mai uh ahi. Mun tuamtuama om Zomite leng eimau kia-in kuamah i dingkhe zo tuankei ding, chih i theih a poimawh hi.

Unaute aw, a tawpna dingin hiai ka gen nuam hi: Gam leh Nam ittu in minphat a sawm kei a, minsiat leng a lau sam kei; ama sia leh pha theihna tawh na asep pen den chianga ding ahi, chih thei in, hinna kepbit ut zenpi-in sihna lampi a zui ngam a, melhoih sangin minhoih ateel a, thudik gupngamnate ziakin bangkim ahuam ahi zaw. A ngaihsutna-a om semkhe dingin bangmah a kidaalsak kei a, tua in kal a suansak a, a phak chianga dik, hoih leh fel hia a theihte a gum a, meetna ding a en kei a, a supna ding leng a kidaalsak sam kei. Thupinate taisanin dikna lampi kawchiik azui a, ginomna leh simmawhna guamah thuakna Inn leng aluah ngamzaw hi.

Hiaite thei gige kawmin, Pathian nei nam i kichih ngal leh, nasemtu thaman mutaak chi-a i thugin in hon hilh muang ngamin lametna tawh mailam nawtin kal i suan ding uh. Nam neipa Toupa ahi a, gam leng Ama-a ahi. I biak Pathian i suk lungtun naak leh agam sunga thilhoih om tengteng ei ading ahi, chih thei in, tawlnga loin panla tou zeel ni.

‘PNC Dam Sawtin, Ma Sawn Zel Hen’

Ka kipaak«

 

.

..

 

..
 
 

 

 

 

SPONSORED BY:  WWW.ZOGAMONLINE.COM  &  WWW.ZOMISTORE.COM  &  WWW.ZOLAWKTA.INFO

 

.

Created (2006) & Maintained by J. Thang Lian Pau

.